शिवाजी पार्कमधील आंदोलनाची ठिणगी थेट शिवसेना भवनापर्यंत! आदित्य-तेजस ठाकरे रस्त्यावर, अमित ठाकरे पोलीस ठाण्यात; मुंबईत नेमकं काय घडलं?
मुंबई : मुंबईतील दादर परिसरात रविवारी राजकीय घडामोडींना वेग आला. कॉक्रोच जनता पार्टीच्या (सीजेपी) आंदोलनासाठी जमलेल्या कार्यकर्त्यांची पोलिसांकडून धरपकड सुरू असतानाच या प्रकरणाची धग शिवसेना भवनापर्यंत पोहोचली. ठाकरे गटाचे आमदार महेश सावंत आणि त्यांच्या कार्यकर्त्यांना ताब्यात घेण्याचा प्रयत्न झाल्यानंतर आदित्य ठाकरे आणि तेजस ठाकरे घटनास्थळी दाखल झाले. दोन्ही बंधूंनी रस्त्यावर ठिय्या मांडल्याने परिसरात तणाव निर्माण झाला. दरम्यान, मनसे नेते अमित ठाकरे पोलिसांच्या कारवाईचा जाब विचारण्यासाठी शिवाजी पार्क पोलीस ठाण्यात पोहोचले.
नेमकं काय घडलं?
सीजेपीने रविवारी, ११ ऑक्टोबर रोजी संध्याकाळी चार वाजता शिवाजी पार्क मैदानात आंदोलनाची हाक दिली होती. आंदोलनाच्या पार्श्वभूमीवर पोलिसांनी मैदान परिसरात मोठा बंदोबस्त तैनात केला. मैदानाकडे जाणारे रस्ते बॅरिकेड्स लावून बंद करण्यात आले होते. तरीही आंदोलकांनी मैदानाच्या दिशेने जाण्याचा प्रयत्न केला. त्यानंतर पोलिसांनी त्यांना ताब्यात घेण्यास सुरुवात केली. या कारवाईदरम्यान मोठी गर्दी जमली आणि घोषणाबाजी सुरू झाली.
काही तरुणींनी रस्त्यावरच ठिय्या मांडत पोलिसांच्या कारवाईला विरोध केला. महिला पोलिसांनी त्यांना ताब्यात घेण्याचा प्रयत्न केला. आंदोलकांचा प्रतिकार आणि पोलिसांची धरपकड यामुळे शिवाजी पार्क परिसरात गोंधळाचं वातावरण निर्माण झालं.
शिवसेना भवनाजवळ शिवसैनिक-पोलीस आमनेसामने
आंदोलकांवरील कारवाई सुरू असतानाच शिवसेना भवन परिसरात ठाकरे गटाचे आमदार महेश सावंत आणि त्यांचे कार्यकर्ते उपस्थित होते. पोलिसांनी त्यांनाही ताब्यात घेण्याचा प्रयत्न केल्याची माहिती समोर आली. यानंतर आदित्य ठाकरे आणि त्यांचे बंधू तेजस ठाकरे तिथे पोहोचले. दोघांनी रस्त्यावर ठिय्या मांडला. त्यांच्यासोबत शिवसैनिकांची गर्दी वाढली आणि कार्यकर्त्यांनी घोषणाबाजी सुरू केली. त्यामुळे शिवसेना भवन परिसरात पोलीस आणि शिवसैनिक समोरासमोर आले.
अमित ठाकरे पोलीस ठाण्यात का गेले?
या घडामोडी सुरू असताना मनसे नेते संदीप देशपांडेही परिसरात उपस्थित होते. पोलिसांच्या कारवाईबाबत जाब विचारण्यासाठी अमित ठाकरे शिवाजी पार्क पोलीस ठाण्यात गेले. त्यामुळे एकीकडे आदित्य आणि तेजस ठाकरे यांचा रस्त्यावर ठिय्या, तर दुसरीकडे अमित ठाकरे यांची पोलीस ठाण्यातील उपस्थिती, अशा दोन घडामोडींनी मुंबईतील राजकीय वातावरण तापलं. सीजेपीच्या आंदोलनावरून सुरू झालेला हा घटनाक्रम पुढे कोणतं वळण घेतो, याकडे लक्ष लागलं आहे.
