कॉलेजला गेली अन् गायब झाली; काही तासांनी आईला ईमेल… ‘त्याच्याशीच लग्न करणार’, कारण वाचून कुटुंब हादरलं!
पुणे : प्रेमाला जात-पात, परिस्थिती किंवा अडचणींची पर्वा नसते, असं म्हटलं जातं. पुण्यातील एका २२ वर्षीय तरुणीच्या निर्णयामुळे मात्र तिच्या कुटुंबीयांसमोरच मोठा प्रश्न उभा राहिला आहे. रोजप्रमाणे कॉलेजला जाण्यासाठी घरातून बाहेर पडलेली तरुणी अचानक बेपत्ता झाली. कुटुंबीय तिचा शोध घेत असतानाच आई, भाऊ आणि लहान बहिणीला तिचा ईमेल मिळाला. या ईमेलमध्ये एका तरुणासोबत आपण निघून जात असल्याचं सांगतानाच, त्याला गंभीर आजार असल्याची माहिती असूनही त्याच्याशीच लग्न करणार असल्याचं तरुणीने नमूद केल्याची माहिती आहे. या घटनेने कुटुंबीयांना मोठा धक्का बसला असून, पोलिसांनी तपास सुरू केला आहे.
हवेली तालुक्यातील एका गावात राहणारी ही २२ वर्षीय तरुणी पुण्यातील खासगी महाविद्यालयात संगणकशास्त्र विषयातील पदवीच्या अंतिम वर्षात शिक्षण घेत आहे. गुरुवारी सकाळी ती नेहमीप्रमाणे कॉलेजला जाण्यासाठी घरातून निघाली. मात्र, बराच वेळ झाला तरी ती घरी परतली नाही. त्यामुळे कुटुंबीयांनी तिच्याशी संपर्क साधण्याचा प्रयत्न केला. फोनवरून संपर्क न झाल्याने आई-वडिलांसह कुटुंबीयांची चिंता वाढली.
यानंतर त्यांनी महाविद्यालय, तिच्या मित्र-मैत्रिणी आणि नातेवाइकांकडे चौकशी सुरू केली. मात्र, तरुणी कुठे गेली याचा काहीच ठावठिकाणा लागला नाही. कुटुंबीय तिचा शोध घेत असतानाच आई, भाऊ आणि लहान बहिणीच्या ईमेलवर तिचा संदेश आला. आपण एका तरुणासोबत निघून जात असल्याचं तिने या संदेशातून स्पष्ट केल्याचं सांगण्यात येत आहे.
मात्र, या ईमेलमधील एका उल्लेखामुळे कुटुंबीयांच्या चिंतेत आणखी भर पडली. संबंधित तरुणाला एड्स असल्याची माहिती आपल्याला असूनही आपण त्याच्याशीच विवाह करणार असल्याचं तरुणीने ईमेलमध्ये नमूद केल्याचं समोर आलं आहे. आपल्या निर्णयाची माहिती कुटुंबीयांना देण्यासाठी तिने हा ईमेल केला असल्याचं सांगण्यात येत आहे.
तरुणीचा हा संदेश मिळाल्यानंतर कुटुंबीयांनी तातडीने पोलिसांकडे धाव घेतली. तरुणीचे वडील यांनी फुरसुंगी पोलिस ठाण्यात ती बेपत्ता झाल्याची तक्रार दाखल केली. पोलिसांनी या प्रकरणी अपहरणाचा गुन्हा दाखल केला असून, बेपत्ता तरुणीचा शोध सुरू केला आहे.
पोलिसांकडून तरुणी सध्या कुठे आहे, तिच्यासोबत असलेला तरुण कोण आहे, दोघे कधी आणि कुठे गेले, तसेच तरुणी सुरक्षित आहे का, याची माहिती मिळवण्याचा प्रयत्न सुरू आहे. तिच्या ईमेलच्या आधारे तपासाची दिशाही निश्चित केली जात आहे.
दरम्यान, तरुणीने घेतलेल्या या निर्णयामागे नेमकं काय कारण आहे, दोघांचं नातं किती जुनं आहे आणि ती स्वेच्छेने संबंधित तरुणासोबत गेली आहे का, याबाबतही पोलिसांकडून तपास केला जात आहे. सध्या या प्रकरणातील सर्व बाबी तपासाच्या टप्प्यात असून, तरुणीचा शोध लागल्यानंतरच संपूर्ण घटनेचं चित्र स्पष्ट होणार आहे.
