‘आई-बाबा, माफ करा…’; डॉक्टर होण्याचं स्वप्न अपुरंच राहिलं, 19 वर्षीय सूरजच्या मृत्यूने गावावर शोककळा
छत्रपती संभाजीनगर : वैद्यकीय क्षेत्रात करिअर करण्याचं स्वप्न पाहणाऱ्या एका तरुणाचा दुर्दैवी अंत झाल्याची हृदयद्रावक घटना छत्रपती संभाजीनगर जिल्ह्यातील वैजापूर तालुक्यात समोर आली आहे. NEET परीक्षेची तयारी करणाऱ्या 19 वर्षीय सूरज सुभाष शिंदे या विद्यार्थ्याच्या मृत्यूने संपूर्ण खंडाळा-भवरबेंद परिसर हादरून गेला असून, कुटुंबासह गावकऱ्यांवर शोककळा पसरली आहे.
माहितीनुसार, सूरज गेल्या काही महिन्यांपासून डॉक्टर होण्याच्या उद्देशाने NEET परीक्षेची तयारी करत होता. अभ्यासात मेहनत घेऊनही अपेक्षित यश मिळाले नसल्याने तो मानसिक तणावात असल्याचे सांगितले जात आहे. कुटुंबीयांनी त्याच्या शिक्षणासाठी कोणतीही कमी पडू दिली नव्हती. मात्र निकालानंतर तो अधिकच शांत आणि एकलकोंडा झाल्याचे जवळच्या लोकांनी सांगितले.
घटना घडली त्यादिवशी गावात धार्मिक सप्ताह सुरू होता. त्यामुळे कुटुंबातील सदस्य काही काळासाठी घराबाहेर गेले होते. दुपारी घरी परतल्यानंतर सूरजशी संपर्क साधण्याचा प्रयत्न करण्यात आला, मात्र त्याचा फोन बंद होता. संशय आल्याने कुटुंबीयांनी घरातील वरच्या खोलीत जाऊन पाहिले असता धक्कादायक प्रकार उघडकीस आला. तातडीने त्याला वैजापूर उपजिल्हा रुग्णालयात नेण्यात आले, पण डॉक्टरांनी त्याला मृत घोषित केले.
या घटनेनंतर घरातून एक भावनिक चिठ्ठीही सापडल्याची माहिती समोर आली आहे. त्यामध्ये आई-वडिलांची माफी मागत कुटुंबाची काळजी घेण्याचा उल्लेख असल्याचे सांगितले जात आहे. ही चिठ्ठी वाचल्यानंतर कुटुंबीयांचा आक्रोश अधिकच वाढला.
सूरजच्या निधनाची बातमी गावात पसरताच मोठ्या संख्येने ग्रामस्थ त्याच्या घरी जमा झाले. अभ्यासू, नम्र आणि मोठी स्वप्ने पाहणारा मुलगा म्हणून त्याची ओळख होती. त्यामुळे त्याच्या अचानक जाण्याने संपूर्ण परिसर हळहळ व्यक्त करत आहे.
या प्रकरणी वैजापूर पोलीस ठाण्यात आकस्मिक मृत्यूची नोंद करण्यात आली असून, पोलिसांकडून सर्व बाजूंनी तपास सुरू आहे. दरम्यान, विद्यार्थ्यांमधील वाढता मानसिक ताण आणि स्पर्धात्मक परीक्षांचे दडपण याविषयी पुन्हा एकदा गंभीर चर्चा सुरू झाली आहे.
