मोठी बातमी! राज्यातील ‘या’ प्रकल्पामुळे शेतकरी होणार करोडपती; एकरी दीड कोटी रुपये, ४ मेपासून पैसे जमा…
पुणे : पुरंदर तालुक्यात प्रस्तावित छत्रपती संभाजी राजे आंतरराष्ट्रीय विमानतळ प्रकल्पासाठी जमीन संपादन प्रक्रियेला अखेर गती मिळाली आहे. शेतकऱ्यांच्या प्रतीक्षेला पूर्णविराम देत संपादित होणाऱ्या जमिनीचा दर एकरी सुमारे दीड कोटी रुपये निश्चित करण्यात आल्याची माहिती समोर आली आहे.
यामुळे अनेक महिन्यांपासून रखडलेली भूसंपादन प्रक्रिया आता प्रत्यक्षात सुरू होणार असून शेतकऱ्यांना मोबदला थेट त्यांच्या बँक खात्यात जमा केला जाणार आहे. हा महत्त्वाकांक्षी विमानतळ प्रकल्प पुणे जिल्ह्याच्या विकासासाठी अत्यंत महत्त्वाचा मानला जात आहे.
या प्रकल्पामुळे औद्योगिक, व्यावसायिक आणि पर्यटन क्षेत्राला मोठी चालना मिळण्याची अपेक्षा आहे. पुणे आणि परिसरातील वाढती लोकसंख्या तसेच हवाई वाहतुकीची गरज लक्षात घेता नवीन विमानतळाची आवश्यकता अधोरेखित होत होती.
भूसंपादनासाठी शेतकऱ्यांना देण्यात येणारा मोबदला हा सर्वात महत्त्वाचा मुद्दा होता. अखेर शासनाच्या उच्चाधिकार समितीने एकरी सुमारे १.५ कोटी रुपये दर निश्चित केला आहे. या निर्णयामुळे शेतकऱ्यांमध्ये समाधानाचे वातावरण निर्माण झाले आहे.
अधिकाऱ्यांच्या माहितीनुसार, ४ मेपासून शेतकऱ्यांच्या खात्यात मोबदला थेट जमा करण्याची प्रक्रिया सुरू होणार आहे. पहिल्या टप्प्यात मोठ्या प्रमाणावर निधी वितरित केला जाणार असून ही प्रक्रिया पूर्णपणे पारदर्शक पद्धतीने राबवली जाणार आहे.
या भूसंपादनासाठी सुमारे ६००० कोटी रुपयांचा निधी आवश्यक असून, तो उभारण्यासाठी विशेष हेतू प्राधिकरणाच्या माध्यमातून कर्ज घेण्याचा निर्णय राज्य सरकारने घेतला आहे. या प्राधिकरणात सिडकोचा ५१ टक्के हिस्सा असून एमआयडीसी, एमएडीसी आणि पीएमआरडीए या संस्थांचा सहभाग आहे.
पुरंदर तालुक्यातील सात गावांमधील जमिनी या प्रकल्पासाठी संपादित करण्यात येणार आहेत. यापूर्वी सर्व प्रशासकीय प्रक्रिया पूर्ण करण्यात आली होती, मात्र मोबदल्याचा दर निश्चित न झाल्यामुळे प्रकल्प रखडला होता.
आता उच्चाधिकार समितीच्या निर्णयानंतर आणि उद्योगमंत्र्यांच्या मान्यतेनंतर भूसंपादन आणि मोबदला वाटप प्रक्रियेला गती मिळाली असून प्रकल्पाच्या अंमलबजावणीचा मार्ग मोकळा झाला आहे.
