मुंबई विमानतळावरील उड्डाणे नवी मुंबईत हलणार की नाही? मुख्यमंत्री फडणवीसांनी स्पष्ट केली भूमिका

मुंबई : मुंबई आणि नवी मुंबई विमानतळांवरील उड्डाणांच्या स्थलांतराबाबत सुरू असलेल्या चर्चेला आता नवे वळण मिळाले आहे. मुंबई विमानतळावरील एकही विमान नवी मुंबई आंतरराष्ट्रीय विमानतळावर हलवण्यात येणार नाही, अशी स्पष्ट भूमिका मुख्यमंत्री देवेंद्र फडणवीस यांनी घेतली आहे. दोन्ही विमानतळ स्वतंत्रपणे आणि आपापल्या क्षमतेनुसार सुरू राहतील, असे त्यांनी स्पष्ट केले आहे.

यासंदर्भात मुख्यमंत्री फडणवीस यांनी केंद्रीय नागरी उड्डाणमंत्र्यांना पत्र लिहिले आहे. मुंबई विमानतळावरील टर्मिनल-१ च्या पुनर्विकासासाठी त्यांनी पर्यायी आराखडाही सुचवला आहे. त्यामुळे विमानांची उड्डाणे दुसऱ्या विमानतळावर हलवण्याऐवजी टप्प्याटप्प्याने पुनर्विकास करण्यावर राज्य सरकारचा भर असल्याचे दिसत आहे.

काय आहे फडणवीसांचा पर्यायी प्रस्ताव?

मुंबई विमानतळावरील टर्मिनल-१ च्या पुनर्विकासाचे काम नियोजनबद्ध पद्धतीने करण्याची सूचना मुख्यमंत्र्यांनी केली आहे. त्यांच्या प्रस्तावानुसार, सर्वप्रथम टर्मिनल-१B उभारण्यात यावे. त्यानंतर सध्या कार्यरत असलेल्या टर्मिनल-१A वरील उड्डाणे नव्या टर्मिनल-१B मध्ये स्थलांतरित करावीत.

टर्मिनल-१A पूर्णपणे रिकामे झाल्यानंतर ते पाडून त्याचा पुनर्विकास करावा, अशी भूमिका फडणवीस यांनी मांडली आहे. या पद्धतीमुळे विमानतळावरील सध्याचे कामकाज पूर्णपणे बंद न करता विस्तार करता येऊ शकतो. तसेच प्रवाशांची गैरसोय आणि विमान कंपन्यांवरील अतिरिक्त ताण टाळण्यास मदत होऊ शकते.

१४ आंतरराष्ट्रीय शहरांमधील उड्डाणे हलवण्याचा होता प्रस्ताव

दरम्यान, मुंबई विमानतळाचे संचालन करणाऱ्या मुंबई इंटरनॅशनल एअरपोर्ट लिमिटेडने (MIAL) टर्मिनल-१ च्या पुनर्विकासासाठी आंतरराष्ट्रीय उड्डाणांचे नियोजन बदलण्याचा प्रस्ताव दिला होता. या प्रस्तावानुसार, मुंबईहून १४ आंतरराष्ट्रीय शहरांमध्ये जाणारी आणि तेथून मुंबईत येणारी उड्डाणे नवी मुंबई विमानतळावर हलवण्याचे नियोजन होते.

या शहरांमध्ये बहरीन, दमाम, ढाका, दोहा, फुजैरा, जकार्ता, जेद्दा, काठमांडू, कुवेत सिटी, मदिना, मस्कत, रास अल खैमाह, रियाध आणि शारजाह यांचा समावेश होता. उन्हाळी वेळापत्रक २०२७ पासून या बदलांची अंमलबजावणी करण्याचा विचार होता.

मात्र, या प्रस्तावाला अनेक विमान कंपन्यांनी विरोध दर्शवला होता. विमानतळ बदलल्यास प्रवाशांना कनेक्टिंग फ्लाइट पकडण्यासाठी मुंबई आणि नवी मुंबई या दोन्ही विमानतळांदरम्यान प्रवास करावा लागू शकतो, अशी चिंता व्यक्त करण्यात आली होती.

आता मुख्यमंत्री फडणवीस यांनी सुचवलेला पर्यायी आराखडा केंद्रीय नागरी उड्डाण मंत्रालयाच्या विचाराधीन आहे. त्यामुळे या प्रस्तावावर केंद्र सरकार काय निर्णय घेणार आणि मुंबई विमानतळाच्या पुनर्विकासाचा मार्ग कसा ठरणार, याकडे प्रवासी तसेच विमान कंपन्यांचे लक्ष लागले आहे.