जमिनीच्या वादातून संतापजनक प्रकार! भाजप पदाधिकाऱ्यासह सहाजणांवर POCSOसह गंभीर गुन्हे; तलवारीचा धाक, अल्पवयीन मुलीशी गैरवर्तनाचा आरोप
अहिल्यानगर : अहिल्यानगर जिल्ह्यातील कर्जत तालुक्यात जमीन वादातून घडलेल्या एका गंभीर घटनेमुळे परिसरात खळबळ उडाली आहे. कुंभेफळ गावात एका कुटुंबावर हल्ला, मारहाण, जीवे मारण्याची धमकी आणि अल्पवयीन मुलीशी गैरवर्तन केल्याप्रकरणी सहा जणांविरोधात पोक्सोसह विविध कलमांखाली गुन्हा नोंदवण्यात आला आहे. या प्रकरणातील प्रमुख आरोपी हा एका राजकीय पक्षाचा तालुका पदाधिकारी असल्याने या घटनेची जोरदार चर्चा सुरू झाली आहे.
पोलिसांनी दिलेल्या माहितीनुसार, फिर्यादी आणि आरोपी यांच्यात गेल्या काही काळापासून जमिनीच्या मालकी व व्यवहारासंदर्भात वाद सुरू होता. हा वाद चिघळल्यानंतर 27 जून रोजी सकाळच्या सुमारास फिर्यादी आपल्या अल्पवयीन मुलीसह शेतात असताना काही जण तेथे आले. फिर्यादीच्या तक्रारीनुसार, आरोपींकडे तलवार आणि काठ्या होत्या. सुरुवातीला शाब्दिक वाद झाला, त्यानंतर परिस्थिती हाताबाहेर गेल्याचा आरोप करण्यात आला आहे.
तक्रारीत नमूद केल्याप्रमाणे, फिर्यादीला मारहाण करण्यात आली, तलवारीने धमकावण्याचाही प्रयत्न झाला. तसेच गळ्यातील सोन्याची साखळी हिसकावून घेतल्याचाही आरोप करण्यात आला आहे. याचवेळी अल्पवयीन मुलीशी अयोग्य वर्तन करण्यात आल्याचा गंभीर आरोपही तक्रारीत करण्यात आला असून, या पार्श्वभूमीवर पोक्सो कायद्याअंतर्गत गुन्हा दाखल करण्यात आला आहे.
आरडाओरड ऐकून परिसरातील नागरिक घटनास्थळी धावून आल्याने पुढील अनर्थ टळल्याचे फिर्यादीने पोलिसांना सांगितले आहे. घटनेनंतर संबंधित कुटुंबाने कर्जत पोलीस ठाण्यात धाव घेत तक्रार दाखल केली.
या प्रकरणी चारपाटीनाथ उर्फ पप्पू धोदाड, भाऊसाहेब धोदाड, सूरज धोदाड, धीरज धोदाड, वैशाली धोदाड आणि अश्विनी धोदाड यांच्याविरोधात विविध गंभीर कलमांखाली गुन्हा दाखल करण्यात आला आहे. पोलिसांकडून घटनेतील सर्व आरोपांची सखोल चौकशी सुरू असून साक्षीदारांचे जबाब, घटनास्थळावरील पुरावे आणि इतर माहितीच्या आधारे पुढील तपास केला जात आहे.
