अमित ठाकरेंवर मारहाणीचे गंभीर आरोप; महेश जाधवांचा कॉंग्रेस गटात जाण्याचा मोठा निर्णय..
मुंबई : महाराष्ट्र नवनिर्माण सेनेचे महाराष्ट्र राज्य उपाध्यक्ष आणि मराठी कामगार सेनेचे अध्यक्ष महेश जाधव यांनी मनसे नेते अमित ठाकरे यांच्यावर गंभीर आरोप केले आहेत. मनसे नेते अमित ठाकरे यांनी शिवीगाळ करत मारहाण केली असल्याचा आरोप जाधव यांनी केला आहे. राज ठाकरे यांची टीम ही खंडणी गोळा करत असल्याचा आरोपही जाधव यांनी केला आहे.
महेश जाधव यांनी मनसे पक्ष सोडल्यानंतरआता राष्ट्रवादीत पक्षप्रवेश करणार आहेत. पूर्वी मनसेत असलेल्या महेश जाधवांनी अमित ठाकरे यांच्यावर मारहाण केल्याचा आरोप केला होता. महेश जाधव हे राष्ट्रवादी कॉंग्रेसच्या अजित पवार गटात जाणार आहेत.
आज दुपारी ३ वाजता वाशीच्या रघुलिला मॉल येथे राष्ट्रवादी कॉंग्रेस पार्टी अल्पसंख्यांक विश्वास मेळाव्याचे आयोजन करण्यात आले आहे. या कार्यक्रमावेळी महेश जाधव आपल्या हजारो माथाडींचे कामगारांच्या उपस्थितीत राष्ट्रवादीत प्रवेश करणार असल्याची माहिती समोर येते आहे.
कोणालाही सोडणार नाही
काही माथाडी कामगारांना घेऊन न्याय मागण्यासाठी मी अमित ठाकरे यांची भेट घेण्यासाठी गेलो होतो. माथाडी कामगारांना त्यांच्या हक्काचं काम मिळावं यासाठी मी भांडत होतो. पण अमित ठाकरे यांनी राज ठाकरे यांचा मित्र विनय अग्रवाल याच्या सांगण्यावरून मला मारहाण केली, असा आरोप महेश जाधवांनी केला आहे. मी अमित ठाकरे आणि राज ठाकरेंना एवढंच सांगेन, मला मारायचं असेल तर जीवे मारा पण मी तुमच्यापैकी कोणालाही सोडणार नाही,असे आव्हान त्यांनी दिले होते. सतत मराठी-मराठी करायचं आणि मराठीच्या नावाखाली आपल्याच माणसांवर अन्याय करायचा, असं सगळं त्यांचं चालू असतं, असेही ते म्हणाले होते.
पक्ष कार्यालयात मारहाण
हे ठाकरे मराठी माणसाचे कैवारी नाहीत. हे थोतांड आणि दलाल आहेत. राज ठाकरेंचा पक्ष दलाल आहे, असा गंभीर आरोप महेश जाधवांनी केला होता. हा केवळ वसुली करणारा पक्ष आहे. या फेसबूक लाईव्हनंतर ते लोक माझा जीव घेतील, मला मारून टाकतील, अशी भीती त्यांनी व्यक्त केली होती.
राज आणि अमित ठाकरे यांच्या लोकांनी मला राजगड (पक्ष कार्यालय) येथे मारहाण केली होती. मी तिथून कसाबसा जीव वाचवून पळून आलो होतो. या माथाडी कामगारांनी मला वाचवलं आणि तिथून पळवून आणलं, असा अनुभव त्यांनी सांगितला होता.
