‘उपोषणाला ब्रेक, लढ्याला नाही’; रोहित पवारांनी सरकारला दिला अंतिम अल्टिमेटम
पंढरपूर : शेतकरी कर्जमाफीच्या अंमलबजावणीतील त्रुटी दूर करण्यासाठी पंढरपूरमध्ये सुरू असलेल्या अन्नत्याग आंदोलनाला अखेर तात्पुरता विराम मिळाला आहे. मात्र, हा संघर्ष संपलेला नसून सरकारच्या पुढील भूमिकेवरच आंदोलनाचे भवितव्य ठरणार असल्याचे स्पष्ट संकेत आमदार रोहित पवार यांनी दिले आहेत.
गेल्या काही दिवसांपासून कर्जमाफीच्या शासन निर्णयातील काही अटींविरोधात रोहित पवार यांनी आंदोलन छेडले होते. या आंदोलनाला विविध शेतकरी संघटना, विरोधी पक्षातील नेते आणि कार्यकर्त्यांचा पाठिंबा मिळत होता. वाढत्या राजकीय आणि सामाजिक दबावाच्या पार्श्वभूमीवर रविवारी राज्याचे मंत्री गिरीश महाजन यांनी थेट आंदोलनस्थळी भेट देत मध्यस्थीची भूमिका बजावली.
बैठकीदरम्यान रोहित पवार यांनी शेतकऱ्यांच्या मागण्यांचे सविस्तर निवेदन सरकारकडे सोपवले. त्यानंतर गिरीश महाजन यांनी मुख्यमंत्री देवेंद्र फडणवीस यांच्याशी दूरध्वनीवर चर्चा केली. या चर्चेनंतर अधिवेशनापूर्वी मुख्यमंत्री आणि शेतकरी प्रतिनिधी यांच्यात संयुक्त बैठक आयोजित करण्याचे संकेत मिळाल्याने आंदोलन स्थगित करण्याचा निर्णय घेण्यात आला.
रोहित पवार यांनी सांगितले की, कर्जमाफीची अंमलबजावणी 30 जूनपासून होणार असल्याने त्याआधीच शासन निर्णयातील त्रुटी दूर करणे आवश्यक आहे. अनेक पात्र शेतकरी काही तांत्रिक अटींमुळे लाभापासून वंचित राहू शकतात, अशी भीती त्यांनी व्यक्त केली. त्यामुळे अंतिम निर्णय होईपर्यंत सरकारने सकारात्मक पावले उचलण्याची गरज असल्याचे त्यांनी म्हटले.
या बैठकीत विविध शेतकरी संघटनांचे प्रतिनिधी, कृषी प्रश्नांवर काम करणारे नेते तसेच विरोधी पक्षातील काही प्रमुख चेहरे सहभागी होण्याची शक्यता आहे. व्यापक चर्चेतून सर्वमान्य तोडगा काढण्याचा प्रयत्न होणार असल्याची माहिती सूत्रांनी दिली.
दरम्यान, आंदोलन स्थगित झाले असले तरी सरकारने दिलेल्या आश्वासनांची अंमलबजावणी झाली नाही तर जुलैच्या पहिल्या आठवड्यात नव्या टप्प्यातील आंदोलन उभारण्यात येईल, असा स्पष्ट इशारा रोहित पवार यांनी दिला आहे. त्यामुळे कर्जमाफीच्या मुद्द्यावर सरकार आणि विरोधकांमधील संघर्ष अद्याप कायम असून पुढील काही दिवसांत या प्रश्नावर महत्त्वाच्या राजकीय घडामोडी घडण्याची शक्यता व्यक्त केली जात आहे.
