मोठी बातमी! शिरुर लोकसभेत बंडखोर पै. मंगलदास बांदल यांना फडणवीस यांच्याकडून भेटीचे फर्मान! ‘सागर’ भेटीची चर्चा बांदलांकडून गुलदस्त्यात..!!
उरुळीकांचन : शिरुर लोकसभा मतदारसंघातून मराठा आंदोलनकर्ते मनोज जरांगे पाटील व वंचित बहुजन आघाडीचे नेते प्रकाश आंबेडकर यांच्या पाठिंब्यावर लोकसभा निवडणुक लढविण्याचा चंग बांधलेले पै. मंगलदास बांदल यांना उपमुख्यमंत्री देवेंद्र फडणवीस यांनी थेट सागर बंगल्यावर भेटीचे निमंत्रण धाडत त्यांचे बंड थोपविण्याचा प्रयत्न केल्याची चर्चा असून देवेंद्र फडणवीस यांच्या सूचनेचा खुलासा करण्यास बांदल यांनी इन्कार दिल्याने शिरुर मध्ये दोघांत तिसरा मधून लढत होणार काय ? म्हणून चर्चेला सुरुवात झाली आहे.
शिरूर मतदारसंघात मंगलदास बांदल यांनी मराठा आंदोलनकर्ते मनोज जरांगे पाटील यांच्या तसेच बहुजन वंचित आघाडीचे नेते प्रकाश आंबेडकर यांच्या पाठिंब्यावर लोकसभेची वारी करण्याचा निर्णय घेतल्याने महायुतीच्या गोटात चिंतेचे वातावरण पसरले आहे. बांदल यांची यापूर्वीची राजकीय भूमिका पाहता त्यांची उमेदवारी महायुतीला डोईजड होते काय म्हणून महायुतीच्या नेत्यांत चर्चा सुरू आहे. बांदल यांनी यापूर्वी शिरुर लोकसभा मतदारसंघ पिंजून काढल्याने तसेच सर्वपक्षीय कार्यकर्ते त्यांच्या थेट संपर्कात असल्याने महायुतीला त्यांची डोकेदुखी होऊ शकते असा राजकीय कयास बांधला जात आहे. त्यामुळेच बांदल यांना थेट उपमुख्यमंत्री देवेंद्र फडणवीस यांनी भेटीसाठी ‘सागर’ बंगल्यावर भेटीचे फर्मान धाडले असल्राची चर्चा आहे.
त्यानुसार मंगलदास बांदल यांनी आज सकाळी ‘सागर’ बंगल्यावर देवेंद्र फडणवीस यांची भेट घेतल्याची चर्चा आहे. या भेटीत त्यांनी शिरूर मतदारसंघातून निवडणूक लढविण्यासाठी तयारी केल्याचे सांगितले असल्याची चर्चा आहे. मात्र मंगलदास बांदल यांनी भेटीचा सविस्तर तपशील सांगण्याचे टाळले आहे.
दरम्यान राज्यात महायुतीला पोषक वातावरण होण्यासाठी उपमुख्यमंत्री देवेंद्र फडणवीस यांनीबंडोबांना थंडोबा करण्यासाठी एक -एक करुन सागर बंगल्यावर धाडले जात आहे. महादेव जानकर, विजय शिवतारे यांचे बंडांचे झेंडे फडणवीस यांनी मोडून काढल्याने बांदल यांच्या निवडणूक लढविण्याबाबत देवेंद्र फडणवीस यांनी काय कानमंत्र दिला आहे. याची सर्वांना मोठी उत्सुकता लागली आहे
