PM Modi : वन नेशन वन इलेक्शन, समान नागरी कायदा लवकरच होणार, नरेंद्र मोदी यांचे मोठं वक्तव्य…
PM Modi : पंतप्रधान नरेंद्र मोदी दोन दिवसांच्या गुजरात दौऱ्यावर आहेत. यादरम्यान त्यांनी आज गुरुवारी (ता. ३१) केवडिया येथील स्टॅच्यू ऑफ युनिटी येथे सरदार वल्लभभाई पटेल यांच्या १४९व्या जयंतीनिमित्त त्यांना आदरांजली वाहिली.
दरवर्षी ३१ ऑक्टोबर रोजी पटेल यांच्या जयंतीनिमित्त राष्ट्रीय एकता दिवस साजरा केला जातो. त्यासाठी भव्य कार्यक्रमाचे आयोजन केले जाते. यावेळी बोलताना पीएम मोदी यांनी सर्व देशवासियांना ‘राष्ट्रीय एकता दिना’च्या शुभेच्छा दिल्या. PM Modi
यावेळी राष्ट्रीय एकता दिवस एक अद्भुत योगायोग घेऊन आला आहे. आज एकीकडे आपण एकात्मतेचा उत्सव साजरा करत आहोत, तर दुसरीकडे दिवाळीचा सण आहे, असे पीएम मोदी यावेळी बोलताना म्हणाले.
‘वन नेशन, वन इलेक्शन’ला लवकरच मंजुरी…
यावेळी पीएम मोदी यांनी बोलताना पुनरुच्चार केला की, आम्ही ‘वन नेशन, वन इलेक्शन’वर काम करत आहोत. याला लवकरच मंजुरी दिली जाईल आणि ते प्रत्यक्षात आणले जाईल. या निर्णयामुळे भारताची लोकशाही मजबूत होईल. तसेच विकसित भारताचे स्वप्न पूर्ण करण्यासाठी देशाला नवी गती मिळेल.
या वर्षाच्या सुरुवातीला मंत्रिमंडळाने या प्रस्तावाला मंजुरी दिली होती आणि या वर्षाच्या अखेरीस संसदेच्या हिवाळी अधिवेशनात हा प्रस्ताव मांडला जाईल. तसेच भारत आता समान नागरी कायद्याच्या या दिशेने वाटचाल करत आहे, असेही पंतप्रधान नरेंद्र मोदी यांनी ‘राष्ट्रीय एकता दिवस’ प्रसंगी बोलताना सांगितले.
