ओमराजे निंबाळकर यांच्या घरी कार्यकर्ते भिडले; जोरदार हाणामारी, नेमकं काय घडलं?
मुंबई : धाराशिवचे खासदार ओमराजे निंबाळकर गेल्या काही दिवसांपासून राजकीय घडामोडींमुळे चर्चेत आहेत. शिवसेना ठाकरे गटातील सहा खासदारांनी उद्धव ठाकरे यांची साथ सोडून शिवसेना शिंदे गटात प्रवेश केल्याची घटना नुकतीच घडली. या सहा खासदारांमध्ये ओमराजे निंबाळकर यांचाही समावेश असल्याचे सांगितले जात आहे.
या राजकीय घडामोडीनंतर आता धाराशिवमधून आणखी एक बातमी समोर आली आहे. ओमराजे निंबाळकर यांच्या घरी आयोजित करण्यात आलेल्या बैठकीनंतर शिवसेना शिंदे गटातील दोन कार्यकर्त्यांमध्ये जोरदार वाद झाल्याची माहिती आहे. वादाचे रूपांतर हाणामारीत झाल्याने काही काळ परिसरात गोंधळाचे वातावरण निर्माण झाले.
मिळालेल्या माहितीनुसार, बैठकीनंतर काही कारणावरून दोन्ही कार्यकर्त्यांमध्ये वाद सुरू झाला. त्यानंतर दोघांमध्ये हाणामारी झाली. मात्र, हा वाद नेमका कोणत्या कारणावरून झाला, याबाबत अद्याप स्पष्ट माहिती समोर आलेली नाही.
दरम्यान, ओमराजे निंबाळकर यांचे बंधू डॉ. जय राजे यांनी मध्यस्थी करत दोन्ही कार्यकर्त्यांमधील वाद मिटवला. त्यामुळे परिस्थिती नियंत्रणात आली.
विशेष म्हणजे पालकमंत्री प्रतापराव सरनाईक हे गेल्या दोन दिवसांपासून धाराशिव जिल्ह्याच्या दौऱ्यावर आहेत. त्यांच्या दौऱ्यादरम्यानच ओमराजे निंबाळकर यांच्या घरी दोन कार्यकर्त्यांमध्ये झालेल्या या वादाची जिल्ह्यात चर्चा सुरू झाली आहे. या घटनेमागील नेमके कारण काय, याबाबत सध्या उत्सुकता निर्माण झाली आहे.
