पुणेकरांना दिलासा देणारी बातमी! पुणे स्टेशनला नवीन पर्याय होणार उपलब्ध, जाणून घ्या संपूर्ण माहिती…
पुणे : पुणेकरांसाठी एक दिलासादायक बातमी समोर आली आहे. रेल्वे स्थानकावरील प्रवाशांचा भार कमी करण्यासाठी लवकरच एक नवीन पर्याय उपलब्ध होणार आहे. हडपसर येथे विकसित करण्यात येत असलेले रेल्वे टर्मिनल या वर्षाच्या डिसेंबर महिन्याच्या अखेरीस कार्यान्वित होण्याची शक्यता आहे.
तसेच या नव्या टर्मिनलमुळे पुणेकरांना, विशेषतः पूर्व पुण्यातील रहिवाशांना, मोठा फायदा होणार असून, त्यांना लांब पल्ल्याच्या गाड्या पकडण्यासाठी पुणे स्टेशनवर जाण्याची आवश्यकता राहणार नाही. यामुळे प्रवाशांचा वेळ वाचेल आणि वाहतुकीचा ताणही कमी होणार आहे.
हडपसर रेल्वे टर्मिनल सुरू झाल्यानंतर, येथून सुरुवातीला आठ नवीन रेल्वे गाड्या धावतील, अशी योजना आखण्यात आली आहे. यात हरंगुळ एक्सप्रेससह इतर गाड्यांचा समावेश असेल. भविष्यात या स्थानकातून धावणाऱ्या गाड्यांची संख्या वाढवण्याचेही नियोजन आहे. हडपसर टर्मिनल हे ‘अमृत भारत स्टेशन’ योजनेअंतर्गत विकसित केले जात असून, या प्रकल्पासाठी सुमारे १३५ कोटी रुपये खर्च केले जात आहेत.
दरम्यान, या नवीन टर्मिनलमुळे प्रवाशांना अनेक आधुनिक सुविधा मिळणार आहेत. येथील ‘अप’ आणि ‘डाउन’ प्लॅटफॉर्मची लांबी ६०० मीटरपर्यंत वाढवण्यात आली आहे, ज्यामुळे येथे २४ डब्यांच्या गाड्याही थांबू शकतील.
तसेच, जुन्या मालवाहतूक मार्गांचे रूपांतर नवीन मालवाहतूक कॉरिडॉरमध्ये करण्यात येत आहे. याशिवाय, टर्मिनलवर एक आधुनिक स्टेशन इमारत, प्रशस्त पार्किंग सुविधा आणि इतर आवश्यक यंत्रणाही उभारण्यात येणार आहेत.
दरम्यान, हडपसर टर्मिनलच्या प्लॅटफॉर्म १, २ आणि ३ चे काम पूर्ण झाले आहे. लवकरच येथे लिफ्ट, एस्केलेटर, १२ मीटर रुंदीचा फुटओव्हर ब्रिज, रूफ प्लाझा आणि निवासगृह यांसारख्या सुविधाही उपलब्ध होणार आहेत. या सर्व सुविधांमुळे प्रवाशांना अधिक चांगला आणि आरामदायी प्रवास अनुभव घेता येणार आहे.
