PF खातेदारांनो, नोकरी सोडताच पैसे काढू नका! ‘या’ वयापर्यंत खात्यावर मिळू शकते व्याज; 55 वर्षांनंतर नियम बदलतो
पुणे : नोकरी सोडल्यानंतर पीएफ खात्यावरचे व्याज तात्काळ बंद होते, अशी अनेक कर्मचाऱ्यांची समजूत आहे. मात्र, प्रत्यक्षात केवळ नोकरी सोडल्यामुळे EPF खात्यावरील व्याज लगेच थांबत नाही. कर्मचारी कोणत्या वयात नोकरी सोडतो किंवा निवृत्त होतो, यानुसार खात्यावर व्याज मिळण्याचा कालावधी ठरतो. त्यामुळे नोकरी बदलताना किंवा निवृत्तीनंतर PFची रक्कम काढण्याची घाई करण्याआधी नियम समजून घेणे महत्त्वाचे आहे.
५०-५२ व्या वर्षी नोकरी सोडली तर मोठा फरक पडतो
एखाद्या कर्मचाऱ्याने वयाची ५५ वर्षे पूर्ण होण्यापूर्वी नोकरी सोडली किंवा स्वेच्छानिवृत्ती घेतली, तरी त्याचे EPF खाते केवळ तीन वर्षांत निष्क्रिय होत नाही. उदाहरणार्थ, ५० किंवा ५२ व्या वर्षी नोकरी सोडल्यास पुढील EPF योगदान जमा होणार नाही; मात्र खात्यात आधीपासून जमा असलेल्या रकमेवर नियमानुसार व्याज मिळू शकते. अशा परिस्थितीत ५८ वर्षांपर्यंत व्याज मिळण्याची शक्यता असते.
५५ वर्षांनंतर मात्र हिशेब बदलतो
कर्मचारी ५५ वर्षे किंवा त्याहून अधिक वयात निवृत्त झाल्यास निवृत्तीनंतर ३६ महिने म्हणजेच तीन वर्षांनंतर EPF खाते निष्क्रिय मानले जाऊ शकते. त्यानंतर त्या खात्यावर व्याज मिळत नाही. उदाहरणार्थ, ५८ व्या वर्षी निवृत्ती घेतल्यास ६१ वर्षांपर्यंत, तर ६० व्या वर्षी निवृत्ती घेतल्यास ६३ वर्षांपर्यंत व्याज मिळू शकते.
खाते निष्क्रिय झाले तरी PFची रक्कम जात नाही
EPF खाते निष्क्रिय झाले म्हणजे त्यातील पैसे संपतात किंवा कर्मचाऱ्याचा हक्क नष्ट होतो, असे नाही. पात्र कर्मचाऱ्याला नियमानुसार दावा करून खात्यातील रक्कम काढता येते. त्यामुळे खाते निष्क्रिय होण्याचा अर्थ रक्कम गमावणे असा अजिबात नाही.
नोकरी बदलली? जुना PF पुढे नेणे फायदेशीर
एका EPF-संलग्न कंपनीतील नोकरी सोडून दुसऱ्या संस्थेत नोकरी स्वीकारल्यास जुने EPF खाते वेगळे ठेवण्यापेक्षा त्यातील रक्कम नवीन खात्यात हस्तांतरित करणे योग्य ठरते. UANशी संबंधित माहिती, केवायसी आणि EPFमधील नोंदी अद्ययावत ठेवणेही महत्त्वाचे आहे.
म्हणूनच ‘नोकरी सोडली = PFचे व्याज बंद’ हा समज पूर्णपणे बरोबर नाही. कर्मचारी किती वयाचा आहे, त्याने नोकरी कधी सोडली आणि निवृत्तीची स्थिती काय आहे, यावर व्याजाचा कालावधी अवलंबून असतो. PFची रक्कम काढण्यापूर्वी लागू EPFO नियम तपासणे आणि खाते व्यवस्थित ठेवणे हा अधिक सुरक्षित पर्याय ठरतो.
