Murlidhar Mohol : पुणे विमानतळावर 16 नवे चेक इन काऊंटर उपलब्ध होणार, मुरलीधर मोहोळ यांची माहिती, पुरंदर विमानतळाचा विषय पडला मागे?

Murlidhar Mohol : पुणे विमानतळाचे नवे टर्मिनल याच वर्षीच्या १४ जुलैपासून कार्यान्वित झाले आहे. या ठिकाणी सध्या ३४ चेक इन काऊंटर उपलब्ध करून देण्यात आले आहेत. असे असताना आता विमानप्रवास करणाऱ्या पुणेकरांची चेक इन प्रक्रिया अधिकाधिक जलद गतीने व्हावी, यासाठी एक महत्वाचा निर्णय घेण्यात आला आहे.

त्यांचा प्रवास सुखकर व्हावा, या उद्देशाने आणखी १६ चेक इन काऊंटर्स पुणे विमानतळाच्या जुन्या टर्मिनलवर उपलब्ध करून देण्याचा निर्णय घेण्यात आला आहे. अशी माहिती नागरी हवाई वाहतूक राज्यमंत्री मुरलीधर मोहोळ यांनी दिली. यामुळे याकडे सर्वांचे लक्ष लागले आहे.

नव्या टर्मिलनची ‘पीक अवर’ क्षमता ३ हजार प्रवासी इतकी आहे. त्यात जुन्या टर्मिनलवर नवे १६ चेक इन काऊंटर उपलब्ध असल्याचे प्रवाशांना मोठा दिलासा मिळणार आहे. विमानतळ प्राधिकरणाच्या माध्यमातून हे काम वेगाने होणार आहे. याबाबत मोहोळ म्हणाले, ‘नव्या चेक इन काऊंटरसह सध्याच्या जुन्या टर्मिनल इमारतीच्या आगमन कक्षाचा कायापालट करून त्याला नव्या एकात्मिक टर्मिनल इमारतीशी पुलाच्या माध्यमातून जोडण्यात येणार
आहे.

त्यासाठी उभारण्यात येत असलेल्या सुरक्षा तपासणी परिसरासाठी डीएफएमडी (डोअर फ्रेम मेटल डिटेक्टर्स) व एक्स रे मशिन्स उपलब्ध करून देण्यात येत आहेत. नव्या टर्मिनलशी एकात्मिक असणारी विमानतळ प्रणाली वापरण्याचा आणि खरेदी दालने उभारण्याचाही निर्णय घेण्यात आला आहे. Murlidhar Mohol

या प्रकल्पासाठी आणखी २५ कोटी रूपये खर्च अपेक्षित असून काम पूर्णत्वास गेल्यानंतर ४ हजार चौरस मीटर अतिरिक्त जागा वापरासाठी उपलब्ध होईल. मार्च २०२५पर्यंत हे काम पूर्ण होणार असल्याचेही मोहोळ यांनी सांगितले.

दरम्यान पुरंदर विमानतळाचा विषय मागे पडला की काय असा प्रश्न उपस्थित केला जात आहे. कारण याबाबत कोणतीही जलद प्रक्रिया होत नाही, याउलट पुणे विमानतळावर अनेक सोयी उपलब्ध करून दिल्या जात आहेत.