सोन्याचे दर घसरण्यामागे मोदींचा मोठा दावा; पुढील २० वर्षांत नोकऱ्यांचे चित्र बदलणार, तरुणांसाठी सांगितला रोजगाराचा नवा फॉर्म्युला!


लखनऊ : सोन्याच्या किमती घसरल्याने ग्राहकांना दिलासा मिळत असतानाच पंतप्रधान नरेंद्र मोदी यांनी या घसरणीमागे सर्वसामान्य नागरिकांच्या प्रतिसादाचा मोठा वाटा असल्याचा दावा केला आहे. मात्र, सोन्याच्या दरांबाबतच्या वक्तव्यापेक्षाही त्यांनी पुढील २० वर्षांतील रोजगाराच्या संधींबाबत केलेले भाकीत चर्चेत आले आहे. भविष्यात पदवीपेक्षा प्रत्यक्ष कामाचे कौशल्य असलेल्या तरुणांना अधिक मागणी असेल, असे संकेत त्यांनी दिले. त्यामुळे आगामी काळात नोकरी मिळवण्याचे समीकरणच बदलणार का, असा प्रश्न उपस्थित होत आहे.

लखनऊ येथे झालेल्या पाचव्या राष्ट्रीय कौशल्य दीक्षांत समारंभात मोदी यांनी हे वक्तव्य केले. वर्षभरापूर्वी गरज नसेल तर सोन्याची खरेदी टाळण्याचे आवाहन आपण केले होते. नागरिकांनी त्याला प्रतिसाद दिला आणि सोन्याचे दर घसरले, असा दावा त्यांनी केला. आपला सल्ला ऐकल्यामुळे काही लोकांचे पैसे वाचल्याचे त्यांनी सांगितल्याचाही उल्लेख मोदी यांनी केला.

पुढील २० वर्षांत नोकरीसाठी पदवी पुरेशी ठरणार नाही?

आगामी काळात केवळ शैक्षणिक पदवी किंवा प्रमाणपत्राच्या जोरावर रोजगार मिळवणे कठीण होऊ शकते. प्रत्यक्ष कामाचा अनुभव, तांत्रिक ज्ञान आणि एखाद्या क्षेत्रातील कौशल्य असणाऱ्या उमेदवारांना अधिक संधी मिळतील, असे मोदी यांनी स्पष्ट केले. पुढील दोन दशके विकसित भारताच्या निर्मितीसाठी महत्त्वाची असून भारतीय कुशल मनुष्यबळाला आंतरराष्ट्रीय स्तरावर मोठी मागणी निर्माण होईल, असेही त्यांनी सांगितले.

परदेशातून दरवर्षी लाखो कुशल कर्मचाऱ्यांची मागणी?

सौदी अरेबिया, दुबई, अबुधाबी, कतार आणि कुवेतसारख्या देशांमध्ये भारतीय कारागीर आणि कामगार महत्त्वाची भूमिका बजावत आहेत. विविध देशांकडून दरवर्षी ९० हजार, एक लाख किंवा दीड लाख कुशल कर्मचाऱ्यांची आवश्यकता व्यक्त केली जात असल्याचा दावा मोदी यांनी केला. या संधी केवळ विद्यापीठातील पदवीधरांसाठी नसून औद्योगिक प्रशिक्षण संस्थांमधून शिक्षण घेतलेल्या तरुणांसाठीही आहेत.

कृत्रिम बुद्धिमत्तेच्या काळातही या कामांना मागणी!

कृत्रिम बुद्धिमत्तेमुळे नोकऱ्या कमी होतील, अशी चिंता व्यक्त होत असली तरी विशिष्ट कौशल्य असलेल्या कामगारांचे महत्त्व कमी होणार नाही, असे मोदी म्हणाले. घराघरांत गॅस जोडणी देण्यासाठी प्रशिक्षित नळकामगारांची कमतरता जाणवत असल्याचे उदाहरण त्यांनी दिले. सौरऊर्जा, इलेक्ट्रिक वाहने, ड्रोन, सायबर सुरक्षा आणि औद्योगिक रोबोटिक्स या क्षेत्रांमध्येही कुशल मनुष्यबळाची गरज वाढणार आहे.

पाच हजार नवीन आयटीआय, ६० हजार कोटींची गुंतवणूक

२०१४ पासून देशात जवळपास पाच हजार नवीन औद्योगिक प्रशिक्षण संस्था सुरू करण्यात आल्या असून, विद्यार्थ्यांची संख्या पाच लाखांहून अधिक वाढल्याची माहिती मोदी यांनी दिली. सध्या आयटीआयमध्ये ड्रोन तंत्रज्ञान, इलेक्ट्रिक वाहने, सायबर सुरक्षा, अर्धसंवाहक आणि औद्योगिक रोबोटिक्सचे प्रशिक्षण दिले जात आहे. पीएम-सेतू योजनेतून ६० हजार कोटी रुपयांची गुंतवणूक केली जात असल्याचाही त्यांनी उल्लेख केला.

त्यामुळे महाराष्ट्रातील तरुणांसाठीही आयटीआय शिक्षण, कौशल्य विकास अभ्यासक्रम आणि प्रशिक्षणार्थी म्हणून काम करण्याच्या संधी महत्त्वाच्या ठरू शकतात. भविष्यात कोणत्या क्षेत्रात कौशल्य मिळवले आहे, हेच रोजगाराच्या दृष्टीने निर्णायक ठरण्याची शक्यता आहे.

Views:

[jp_post_view]

Leave a Reply

Your email address will not be published. Required fields are marked *

error: Content is protected !!