मोदी सरकारचा मोठा निर्णय! पेट्रोल डिझेलवरील उत्पादन शुल्कात वाढ, आता दरही वाढणार…
नवी दिल्ली : सर्वसामान्यांना धक्का देणारी बातमी समोर आली आहे. कारण देशभरात पेट्रोल, डिझेल महागणार आहे. पेट्रोल, डिझेलवरील उत्पादन शुल्कात वाढ करण्याचा निर्णय सरकारनं घेतला आहे. पेट्रोलवरील उत्पादन शुल्क २ रुपयांनी, तर डिझेलवरील उत्पादन शुल्कही २ रुपयांनी वाढवण्यात आलं आहे. तसेच पेट्रोल, डिझेलचे नवे दर उद्यापासून लागू होणार आहेत.
दरम्यान, मोदी सरकारने पेट्रोल, डिझेलवरील उत्पादन शुल्कात तडकाफडकी वाढ केल्यानंतर सरकारने या प्रकरणात तातडीने स्पष्टीकरण दिले आहे. सरकारने वाढवलेल्या उत्पादन शुल्काचा कोणताही परिणाम सर्वसामान्य ग्राहकांवर होणार नाही, असे केंद्राकडून स्पष्ट करण्यात आले आहे.
सरकारनं पेट्रोल, डिझेलवरील उत्पादन शुल्कात वाढ केलेली आहे. पण याचा कोणताही परिणाम ग्राहकांवर होणार नसल्याचे सरकारकडून सांगण्यात आले आहे. तेल क्षेत्रातील पीएसयू कंपन्या उत्पादन शुल्कातील वाढीनंतर पेट्रोल, डिझेलच्या दरात कोणतीही वाढ करणार नसल्याचं पेट्रोलियम आणि नैसर्गिक वायू मंत्रालयानं सांगितले आहे.
भारतात पेट्रोल, डिझेलवर केंद्र सरकारकडून उत्पादन शुल्क लावण्यात येतं. इंधनाच्या किमती निश्चित होत असताना त्यात उत्पादन शुल्काचा भाग महत्त्वाचा असतो. सध्याच्या घडीला पेट्रोलवरील उत्पादन शुल्क १९.९० रुपये प्रति लीटर आहे. तर डिझेलवर लीटरमागे १५.८० रुपये उत्पादन शुल्काची आकारणी होते.
