‘कोरेगावमूळ’ला सरपंच विठ्ठल शितोळे यांच्या विरोधात सदस्यांनी दाखल केला अविश्वास ठराव…!
उरुळी कांचन : कोरेगाव मूळ (ता. हवेली) ग्रामपंचायतीचे विद्यमान सरपंच विठ्ठल राजाराम शितोळे यांच्या विरोधात १३ पैकी १० ग्रामपंचायत सदस्यांनी अविश्वास ठराव दाखल केला असून, या अविश्वासावर हवेलीचे तहसिलदार किरण सुरवसे हे बुधवार (ता.२२) सदस्यांची मते आजमावून निर्णय घेणार आहे.
कोरेगाव ग्रामपंचायतीच्या १० सदस्यांनी दाखल केलेल्या अविश्वास ठरावात विश्वासात न घेता निर्णय घेणे, सभागृहात बहुमताने घेतलेल्या ठरावाची अंमलबजावणी करण्यास टाळाटाळ करणे, ग्रामपंचायत सदस्यांना विश्वासात न घेता कामकाज करणे, सदस्यांना अपमानास्पद वागणूक देणे, मनमानी पद्धतीने कामकाज करणे, सुचविलेली कामे न करणे आदी आक्षेप नोंदविले आहे.
दरम्यान कोरेगावमूळची ग्रामपंचायत पंचवार्षिक निवडणूक दोन वर्षापूर्वी पार पडली आहे. या ठिकाणी सरपंचपद विभागून न दिल्याने कुरबर सुरू आहे. अखेर सरपंचांवर अविश्वास बुधवार( ता.१५) दाखल करण्यात आला आहे. या अविश्वासावर हवेलीचे तहसिलदार किरण सुरवसे सदस्यांची मते आजमावून घेणार आहे. दाखल अविश्वावर १० सदस्यांनी बाजूने मतदान केल्यास ठराव संमत होणार असुन सदस्यसंख्येतील ४ सदस्यांनी अविश्वास ठरावाच्या विरोधात मत टाकल्यास अविश्वास ठराव फेटाळला जाणार आहे.
यांचदरम्यान दाखल अविश्वास ठरावास उपसरपंच वैशाली अमित सावंत, ग्रामपंचायत सदस्य बापूसाहेब यशवंत बोधे, भानुदास खंडेराव जेधे, मंगेश अशोक कानकाटे, सचिन गुलाब निकाळजे, लिलावती बापूसाहेब बोधे, अश्विनी चिंतामणी कड, राधिका संतोष काकडे, मंगल जगन्नाथ पवार, पल्लली नाजीरकर यांनी स्वाक्षऱ्या केल्या आहेत.
