जयंत पाटील अखेर सोडणार पक्ष? शरद पवार यांच्या भेटीपूर्वी अजित पवार अन् जयंत पाटील यांची बंद दाराआड चर्चा..
पुणे : आज पुण्यातील मांजरी येथील वसंत दादा शुगर इन्स्टिट्यूटच्या बैठकीसाठी शरद पवार आणि अजित पवार पुन्हा एकदा एकत्र येणार आहे. या भेटीपूर्वी मोठी राजकीय घडामोड घडली आहे. राष्ट्रवादी काँग्रेस शरदचंद्र पवार गटाचे प्रदेशाध्यक्ष जयंत पाटील आणि राष्ट्रवादी काँग्रेसचे अध्यक्ष अन् उपमुख्यमंत्री अजित पवार यांच्यात चर्चा झाली.
विशेष म्हणजे ही चर्चा होत असताना अजित पवार यांनी सगळे पीए आणि इतर अधिकाऱ्यांना बाहेर जाण्यास सांगितले. 30 मिनिटांपेक्षा जास्त वेळ ही चर्चा झाली. जयंत पाटील यांच्यासंदर्भात गेल्या काही दिवसांपासून चर्चा सुरु आहे. ते अजित पवार यांच्या गटात येणार असल्याचे म्हटले जाते. परंतु या चर्चांना जयंत पाटील यांनी अफवा असल्याचे म्हटले आहे.
असे असताना मात्र, राजकीय गटात याबाबत चर्चा थांबत नाही. आज वसंतदादा शुगर इन्स्टिट्यूटच्या गव्हर्निंग कौन्सिलची बैठक आहे. त्या बैठकीत शरद पवार-अजित पवार पुन्हा एकदा एकत्र येणार आहे. त्यापूर्वी अजित पवार आणि जयंत पाटील यांच्यात बंद दाराआड चर्चा झाली. यामुळे आता येणाऱ्या काय घडणार हे लवकरच समजेल.
दरम्यान, उपमुख्यमंत्री अजित पवार यांना भेटण्यासाठी आणि त्यांना निवेदन देण्यासाठी आज गर्दी होती. परंतु जयंत पाटील त्यांना भेटण्यासाठी आल्यावर अजित पवार यांच्या कक्षात असलेल्या सर्व लोकांना बाहेर काढण्यात आले. यावेळी कोणीही उपस्थित नसल्याचे सांगितले जात आहे.
यावेळी सुरक्षा रक्षकांनाही बाहेर काढण्यात आले. अजित पवार यांच्या स्वीय सहायकांनाही बाहेर जाण्यास सांगण्यात आले. त्यानंतर बंद दाराआड चर्चा सुरु झाली. यामुळे येणाऱ्या काळात जयंत पाटील अजित पवार गटात जाणार का? हे लवकरच समजेल. याकडे सर्वांचे लक्ष लागले आहे.
