येरवडा कारागृहात कैद्यांकडे पुन्हा दोन मोबाइल सापडले; चार जणांवर गुन्हा दाखल..
पुणे : येरवडा मध्यवर्ती कारागृहातील कैद्यांकडे पुन्हा एकदा दोन मोबाइल, दोन बॅटऱ्या आणि एक सिमकार्ड सापडले आहे. हा प्रकार ५ ऑगस्ट दुपारी साडेचार ते ६ ऑगस्ट दुपारी साडेचार च्या दरम्यान घडला आहे. मागील काही महिन्यांपासून सातत्याने कारागृहात मोबाइल सापडत असल्याच्या घटना समोर येत आहे.
याप्रकरणी न्यायबंदी तालीम मोहम्मद खान, राजु तुकाराम अस्वले, सचिन उर्फ पप्पू दत्तात्रय घोलप व आकाश उत्तम रणदिवे यांच्याविरुद्ध येरवडा पोलीस ठाण्यात मंगळवारी (ता. ८) गुन्हा दाखल करण्यात आला आहे. याबाबत तुरुंगाधिकारी रेवनाथ कडू कानडे (वय. ५४) यांनी फिर्याद दिली आहे.
मिळालेल्या माहिती नुसार, फिर्य़ादी हे ५ ऑगस्ट रोजी येरवडा मध्यवर्ती कारागृहात कर्तव्यावर असताना त्यांना न्यायबंदी तालीम खान हा मोबाईल वापरत असल्याची माहिती मिळाली.
आरोपीला बोलावून घेऊन त्याची अंगझडती घेतली असता त्याच्या पॅन्टच्या खिशात मोबाईल फोन बॅटरीसह लपवून ठेवल्याचे आढळून आले. तसेच ६ ऑगस्ट रोजी दुपारी साडेचारच्या दरम्यान टिळक सेप्रेट खोली क्रमांक ३० मध्ये झडती घेण्यात आली. त्यावेळी न्यायबंदी राजू अस्वले याच्या अंगझडती मध्ये मोबाईल फोन बॅटरीसह व एअरटेल कंपनीचे सिमकार्ड लपवून ठेवल्याचे आढळून आले.
आरोपी राजु अस्वले, सचिन उर्फ पप्पू घोलप व आकाश रणदिवे यांनी संगनमत करुन येरवडा मध्यवर्ती कारागृहात बाहेरुन आतमध्ये मोबाईल फोन घेऊन येऊन त्याचा वापर केला. आरोपींनी कारागृह नियमांचा भंग केला असून आरोपींवर गुन्हा दाखल करण्यात आला आहे.
दरम्यान, घटनेची माहिती मिळताच वरिष्ठ पोलीस निरीक्षक बाळकृष्ण कदम , पोलीस निरीक्षक कांचन जाधव, पोलीस उपनिरीक्षक सुरेखा गाताडे यांनी घटनास्थळी भेट दिली. पुढील तपास येरवडा पोलीस ठाण्यातील पोलीस उपनिरीक्षक सुरेखा गाताडे करीत आहेत.
