पुण्यात कोयता पुन्हा गँगची दहशत, घाव घालून तरुणाच्या हाताचा पंजा तोडल्याने खळबळ..
पुणे : दिवसागणिक पुण्यातली गुन्हेगारी वाढते आहे असं म्हटलं तरी हरकत नाही. कोयता घेऊन रस्त्याने फिरणे, टोळा धाडी, गाड्या जाळणे एवढंच नाही तर शुल्लक रकमेसाठी हात तोडण्यासारख्या अंगावर काटा आणणारे प्रकार सध्या पुण्यात वेगात वाढले आहेत.
तसेच कोयता गँगची पुण्यात दहशत कायम असून पुन्हा एकदा कोयता गँगने राडा केल्याची घटना घडली आहे. टोळक्याने तरुणाच्या हाताचा पंजा कोयत्याने तोडला आहे. या घटनेने नंतर एकच खळबळ उडाली आहे.
पीयूष पाचकुडवे असे या घटनेत जखमी झालेल्या तरुणाचे नाव आहे. याप्रकरणी सागर सरोज आणि त्याच्या इतर साथीदारांवर गुन्हा दाखल करण्यात आला आहे.बिबवेवाडी पोलिसांनी याप्रकरणी एका अल्पवयीन तरुणासह २ जणांना ताब्यात घेतले आहे.
मिळालेल्या माहिती नुसार, हा सर्व प्रकार सोमवारी सायंकाळी ४.३० वाजता घडला. फिर्यादी आणि त्याचा मित्र पीयूष यांना आरोपींनी भेटायला बोलावले होते. पूर्वी त्यांच्यात वाद झाल्याने या वादाचा बदला घेण्यासाठी आरोपींनी त्यांच्यावर कोयत्याने वार केले. यामध्ये पीयूष याच्या हातावर आरोपींनी कोयता मारला ज्यामध्ये त्याच्या हाताचा पंजा खाली पडला आणि पीयूष गंभीर जखमी झाला.
इतकंच नाही तर पीयूषच्या हातावर आणि मांडीवर सुद्धा आरोपींनी कोयत्याने वार केले. कोयता हल्ल्यामध्ये दोन्ही तरुण गंभीर जखमी झाले असून जखमींना तातडीने ससून रुग्णालयात दाखल करण्यात आले. याप्रकरणाचा अधिक तपास पोलिसांकडून सुरू आहे.
