भक्तांसाठी आनंदाची बातमी!! पुणे ते शेगाव वंदे भारत एक्सप्रेस सुरू होणार! कोणत्या स्टेशनवर थांबा घेणार, जाणून घ्या…
पुणे : महाराष्ट्र राज्यात सध्या 11 मार्गांवर वंदे भारत एक्सप्रेस ट्रेन सुरू आहेत. असे असताना आता महाराष्ट्राला आणखी एका नव्या गाडीची भेट मिळणार आहे. ही नवी गाडी पुणे ते शेगाव दरम्यान चालवली जाणार आहे. यामुळे याठिकाणी प्रवास करणारांसाठी ही एक आनंदाची बातमी आहे.
ही गाडी सुरू झाल्यानंतर पुणेकरांना मोठा दिलासा मिळणार आहे. कारण पुण्यातून याठिकाणी जाणारांची संख्या मोठी आहे. श्री क्षेत्र शेगाव येथील असंख्य लोक पुण्यात कामा निमित्ताने येतात. तसेच देवाला याठिकाणी जातात. सध्या पुण्याला तीन वंदे भारत एक्सप्रेसची भेट मिळालेली आहे, यातील दोन गाड्या थेट पुण्यातून सुटतात तर एक गाडी मुंबईवरून सुटते.
आता मिळणारी चौथी गाडी पुणे ते शेगाव या मार्गावर चालवली जाणार असून ही गाडी उत्तर महाराष्ट्रातील अनेक महत्त्वाच्या स्थानकावर थांबवली जाईल. या गाडीला उत्तर महाराष्ट्रातील भुसावळ आणि जळगाव या महत्त्वाच्या रेल्वे स्थानकावर थांबा मंजूर होऊ शकतो. याबाबत अधिकृत माहिती पुढे आली नाही.
दरम्यान, भुसावळ हे मध्य रेल्वे मार्गावरील एक अतिशय महत्त्वाचे आणि मोठे रेल्वे स्थानक आहे. रेल्वे मार्गावरील भुसावळ आणि जळगाव ही उत्तर महाराष्ट्रातील दोन महत्त्वाची रेल्वे स्थानके असून येथून पुण्याकडे आणि शेगावला जाणाऱ्यांची संख्या मोठी आहे.
दरम्यान, अजून भुसावळ रेल्वे स्थानकाला वंदे भारत एक्सप्रेसची भेट मिळावी, अशी येथील प्रवाशांची मागणी आहे. आता ही मागणी लवकरच पूर्ण होण्याची शक्यता वर्तवली जात असून पुणे ते शेगाव दरम्यान वंदे भारत ट्रेन चालवली जाऊ शकते. यामुळे याकडे सर्वांचे लक्ष लागले आहे.
