बारामती शहरात कोयता घेऊन दहशत माजवणाऱ्यांची जिरली! चौघे गजाआड, चौघांना थेट येरावड्याचा रस्ता…

बारामती : बारामतीमध्ये कोयता घेऊन दहशत माजवणाऱ्या चौघांची थेट मध्यवर्ती कारागृह येरवडा येथे रवानगी करण्यात आली आहे. यामुळे आता अशी कृत्य करताना अनेकांना विचार करावा लागेल. बारामती शहरातील ही पहिलीच कारवाई आहे. याआधी पुणे शहरात मोठ्या प्रमाणावर अशा प्रकारच्या घटना घडल्या आहेत.
सदरचा प्रतिबंधात्मक कारवाईचा प्रस्ताव हा शहर पोलीस ठाणे पोलीस निरीक्षक विलास नाळे यांनी अप्पर पोलीस अधीक्षक बारामती कार्यालयास पाठवलेला होता. यामध्ये यश दीपक मोहिते, शुभम उर्फ बाळू काळू जगताप ( रा.आमराई, बारामती ) आदित्य राजू मांढरे (रा.चंद्रमणी नगर रा. आमराई बारामती), अनिकेत केशवकुमार नामदास (रा. दीपनगर भवानीनगर ता. इंदापूर जिल्हा पुणे) या चौघांचा समावेश आहे.
त्यांची मध्यवर्ती कारागृह येरवडा पुणे येथे साध्या कारावासासाठी रवानगी केलेली आहे. बारामती शहर पोलीस स्टेशन हद्दीमध्ये कोयता हातात घेऊन मिरवणाऱ्या वरील आरोपीवर प्रतिबंधात्मक कारवाई करून योग्य जामीनदार हजर करू न शकल्याने त्यांची येरवडा येथे रवानगी करण्यात आली आहे. याबाबत निर्णय घेण्यात आला आहे.
दरम्यान, सोशल मीडियाच्या माध्यमातून शस्त्रे हातात घेऊन स्टेटस ठेवणाऱ्या युवकांवर गुन्हेगारांवर कारवाई करण्याचा इशारा बारामती पोलीस प्रशासनाने दिलेला होता. यासाठी पोलिसांनी एक नंबर दिला आहे. शक्ती नंबर – 9209394917 काही तक्रार असेल तर यावर संपर्क करण्याचे आवाहन करण्यात आले आहे.
दरम्यान, जागरूक पालकांनी, शिक्षकांनी, तसेच नागरिकांनी शहरातील चौका चौकात टवाळखोरी करणाऱ्या, शाळा महाविद्यालय परिसरात मुलींची छेडछाडी करणाऱ्या, उघड्यावर मद्य प्राशन करणाऱ्या युवकांची माहिती व फोटो शक्ती नंबरवर पाठवावी. त्यांच्यावर योग्य कायदेशीर कारवाई करण्यात येईल. असेही सांगितले गेले आहे.