‘मी प्रेस घेतली तर, या खासदाराची चड्डीसुद्धा…’ : सहाय्यक पोलीस निरीक्षकाची बजरंग सोनवणेंविरोधात वादग्रस्त पोस्ट
बीड : बीडच्या जिल्हा पोलीस प्रेस व्हॉट्सअॅप ग्रुपवर एका सहाय्यक पोलीस निरीक्षकानेच खासदार बजरंग सोनवणे यांच्याबाबत वादग्रस्त पोस्ट केल्याचे समोर आले आहे. या पोस्टनंतर काही वेळातच वरिष्ठांकडून त्यांना रिमुव्ह करण्यात आलं. मात्र पोलिसांनीच खासदारांविरोधात केलेली पोस्ट चर्चेचा विषय बनली आहे.
सहाय्यक पोलीस निरीक्षक गणेश मुंडे हे नेहमीच वादग्रस्त राहिले आहेत. बीड पोलीस प्रेस ग्रुपवर त्यांनी शनिवारी एक पोस्ट केली. ज्यात खासदार बजरंग सोनवणे यांच्या विरोधात वादग्रस्त लिखाण करण्यात आले होते. बजरंग सोनवणे यांनी शुक्रवारी मानवाधिकार आयोगाकडे तक्रार करत गणेश मुंडे आणि दहिफळे या दोन सहाय्यक पोलीस निरीक्षक दर्जाच्या अधिकाऱ्यांचे कॉल रेकॉर्ड तपासण्याची मागणी केली आणि शनिवारी गणेश मुंडे यांनी एसपींच्या अधिपत्याखाली सुरू असलेल्या या ग्रुपवर ही पोस्ट केली.
गणेश मुंडे यांच्या पोस्टमध्ये नेमकं काय?
गणेश मुंडे यांनी एसपींच्या अधिपत्याखाली सुरु केलेल्या बीड पोलीस प्रेस या व्हॉट्सअॅप ग्रुपवर शनिवारी (4 जानेवारी) रोजी सायंकाळी एक पोस्ट केली. यामध्ये ”या खासदाराची चड्डीसुद्धा जागेवर राहणार नाही, मी प्रेस घेतली तर…, असं म्हटलं आहे. या पोस्टनंतर खासदार कोण?, अशी विचारणा देखील काही पत्रकारांनी ग्रुपवर केली. यानंतर स्थानिक गुन्हे शाखेचे पोलीस निरीक्षक उस्मान शेख यांनी गणेश मुंडे यांना सदर ग्रुपमधून काढून टाकले.
गणेश मुंडे आणि दहिफळे यांचे कॉल रेकॉर्ड तपासा; बजरंग सोनावणेंची मागणी
बीडमधील मस्साजोगचे सरपंच संतोष देशमुख यांची निघृण हत्या करण्यात आली. या प्रकरणातील सहा आरोपींना आतापर्यंत अटक करण्यात आली असून एक आरोपी अद्यापही फरार आहे. दरम्यान याप्रकरणातील सर्व आरोपींना कठोर शिक्षा व्हावी, अशी मागणी बजरंग सोनावणे यांनी केली आहे. तसेच बजरंग सोनावणे यांनी गणेश मुंडे आणि दहिफळे या दोन सहाय्यक पोलीस निरिक्षकांचे कॉल रेकॉर्ड तपासण्याचीही मागणी केली आहे.
