अश्लील फोटो, ५० लाखांची खंडणी अन् ब्लॅकमेलिंग, माजी नगरसेवकासोबत घडलं भयंकर…
बदलापुर : बदलापुरात माजी नगरसेवकाला अश्लील फोटो व्हायरल करण्याची धमकी देत ५० लाख रुपयांची खंडणी मागितल्याचा धक्कादायक प्रकार समोर आला आहे. बदलापूरचे माजी नगरसेवक शैलेश वडनेरेंसोबत हा प्रकार घडला. याप्रकरणी बदलापूर पूर्व पोलिसांनी गुन्हा दाखल करत चार आरोपींना बेड्या ठोकल्या आहेत.
बदलापूरमधील माजी नगरसेवक शैलेश वडनेरे यांना महिन्याभरापूर्वी एका अज्ञात नंबरवरून व्हॉट्सॲपवर एक व्हिडीओ आला होता. या व्हिडीओमध्ये त्यांचे अश्लील फोटो होते. यानंतर समोरच्या व्यक्तीने हा व्हिडीओ व्हायरल करण्याची धमकी दिली.
यानंतर त्यांनी त्यांच्याकडे ५० लाख रुपयांची खंडणी मागितली. सुरुवातीला हा खोडसाळपणा वाटल्याने वडनेरे यांनी त्याकडे लक्ष दिलं नाही. मात्र खंडणीखोरांचा तगादा वाढल्यानंतर वडनेरे यांनी बदलापूर पूर्व पोलीस ठाण्यात याबाबत तक्रार केली.
या तक्रारीची गंभीर दखल घेत बदलापूर पूर्व पोलीस ठाण्याचे वरिष्ठ पोलीस निरीक्षक किरण बालवडकर आणि राजेश गज्जल यांनी तांत्रिक तपास केला. यानंतर त्यांनी बदलापूरमधूनच चार जणांना बेड्या ठोकल्या.
अक्षय उर्फ बकरी गोविंद जाधव, रोनित दयानंद आडारकर, दीपक मधुकर वाघमारे आणि पुष्कर हरिदास कदम अशी या चौघांची नावं आहेत. या सर्वांना १२ मार्च रोजी न्यायालयात हजर करण्यात आले. यावेळी न्यायालयाने त्यांना १५ मार्चपर्यंत पोलीस कोठडी सुनावली आहे.
