मोठी बातमी! ‘पीएमआरडीए’ डीपी अखेर रद्द; मुख्यमंत्री देवेंद्र फडणवीस यांचा धडाकेबाज निर्णय…

जयदिप जाधव

उरुळीकांचन : पुणे महानगर प्रदेश विकास प्राधिकरणाच्या (पीएमआरडीए) सहा हजार चौरस किलोमीटर परिसराचा प्रारूप विकास आराखडा (डीपी) अखेर मुख्यमंत्री देवेंद्र फडणवीस यांनी रद्द केला आहे. गेल्या आठ वर्षांहून अधिक काळ रखडलेली ही विकास आराखड्याची प्रक्रिया पुन्हा राबवावी लागणार असून, त्याचा आदेश ‘पीएमआरडीए’ ला देण्यात आला आहे.

पीएमआरडीए’ला नुकताच सरकारचा आदेश प्राप्त झाला असून, नव्याने आराखड्याची प्रक्रिया करताना रस्ते, आरक्षणे आणि इतर झोन निश्चित करण्यासाठी आणखी विलंब होण्याची शक्यता आहे. पुणे आणि पिंपरी-चिंचवड शहर व आजूबाजूच्या परिसरातील नागरिकांचे राहणीमान सुधारण्यासाठी २०१५मध्ये ‘पीएमआरडीए’ची स्थापना करण्यात आली.

२०१७मध्ये संपूर्ण हद्दीचा विकास आराखडा करण्यासाठी इरादा जाहीर केला गेला. दोन ऑगस्ट २०२१ रोजी हा प्रारूप विकास आराखडा तयार करून जाहीर करण्यात आला. त्यावर जवळपास ६७हजार नागरिकांनी हरकती, सूचना दाखल केल्या. या हरकतींवरील सुनावणीची प्रक्रिया पूर्ण झाल्यानंतर अंतिम आराखडा जाहीर होण्याची प्रतीक्षा असतानाच, विकास आराखड्याच्या प्रक्रियेबाबत प्रश्न उपस्थित करून, त्याविरोधात उच्च न्यायालयात याचिका दाखल करण्यात आली. ऑक्टोबर २०२२ पासून या विकास आराखड्याबाबत कोणताही अंतिम निर्णय घेण्यास उच्च न्यायालयाने स्थगिती दिल्याने ही सर्व प्रक्रियाच ठप्प झाली.

न्यायालयात हे प्रकरण निकाली निघत नसल्याने अखेर हा आराखडाच रद्द करण्याचा निर्णय राज्य सरकारने घेतला. मुख्यमंत्री देवेंद्र फडणवीस यांनी पीएमआरडीए’ला दिल्या आहेत. प्रारूप आराखडा रद्द केल्याची माहिती उच्च न्यायालयापुढे सादर करावी, असे निर्देश राज्य सरकारने ‘पीएमआरडीए’ला दिले आहेत. त्यामुळे उच्च न्यायालयात दाखल करण्यात आलेल्या डीपी विरोधातील याचिका निकाली निघतील, अशी अपेक्षा आहे.

आराखड्याची रूपरेषा नव्याने ठरविण्यात येऊन ती राज्य सरकारकडे सादर करण्यात येणार आहे. कायद्यानुसार रद्द करण्यात आलेल्या आराखड्यात काय-काय बदल करावे लागतील, हे कळविण्यात येणार आहे. आराखड्याची मूळ संकल्पना बदलणार नाही; मात्र १८ मीटरचे रस्ते नव्याने टाकावे लागणार आहेत. याशिवाय आरक्षणदेखील नव्याने टाकावे लागणार आहे. रद्द करण्यात आलेल्या आराखड्यातील ज्या बाबींमुळे न्यायालयात जावे लागले, त्या सर्व बाबी बदलाव्या लागणार आहेत, असे ‘पीएमआरडीए’च्या वरिष्ठ अधिकाऱ्यांनी अशी माहिती दिली आहे.

आमदार राहुल कुल यांच्या पाठपुराव्याला यश..

महाविकास आघाडीच्या सरकारच्या काळात तयार केलेल्या पीएमआरडीए च्या डीपी माध्यमातून मोठे संक्षयास्पद काम झाल्याची चर्चा होती. अगदी डीपी कोणत्या नियम व अटींना बांधून झाला याची माहितीही वरिष्ठ स्तरावर मिळत नसल्याची परिस्थिती होती. डीपीच्या माध्यमातून मोठी अर्थिक तडजोड करण्यात आल्याची चर्चा होती. काही नगरनियोजन प्राधिकृत अधिकाऱ्यांनी बिल्डर, अधिकारी व राजकारणी यांच्या माध्यमातून या वर्गाला विशिष्ठ रहिवासी क्षेत्राचे प्रायोजन केल्याचे आरोप करण्यात येत होते. या मुद्द्यावर दौंड चे आमदार राहुल कुल यांनी या अन्यायकारक ‘डीपी’वर मुख्यमंत्रीपदाची सुत्रे देवेंद्र फडणवीस यांच्या हाती आल्यानंतर सातत्याने त्यांच्यापुढे चुकीच्या बाजू मांडल्या होत्या. तसेच लक्षवेधी सूचना मांडून नगरविकास खात्याच्या तत्कालीन कामाचे वाभाडे काढले होते.