विठ्ठलभक्तांसाठी मोठी बातमी!! चंदनउटी, नित्यपूजेसाठी २५ मार्चपासून करा ऑनलाईन नोंदणी, जाणून घ्या…

पंढरपूर : विठ्ठलभक्तांसाठी एक आनंदाची बातमी आहे. तसेच श्री विठ्ठल आणि रुक्मिणी मातेची पूजा करण्यासाठी अनेक भाविकांची इच्छा असते. अशा विठ्ठल भक्तांसाठी आनंदाची बातमी आहे. आता सावळ्या विठुरायाच्या पूजेसाठी घरबसल्या नोंदणी करता येणार आहे.

दरम्यान, १ एप्रिल ते ३१ जुलै या काळातील देवाच्या पूजेसाठी संकेतस्थळावरून ऑनलाईन नोंदणी करता येणार आहे. येत्या २५ मार्च रोजी सकाळी ११ वाजल्यापासून सदरची ऑनलाईन नोंदणी सुरू करण्यात येत आहे, अशी माहिती श्री विठ्ठल रुक्मिणी मंदिर समितीचे कार्यकारी अधिकारी राजेंद्र शेळके यांनी दिली आहे.

तसेच श्री विठ्ठल आणि रुक्मिणी मातेच्या नित्यपूजा, पाद्यपूजा, तुळशी अर्चना पूजा, चंदनउटी पूजा आदी प्रकारच्या पूजा रोज होत असतात. या पूजा मंदिर समितीकडून भाविकांना उपलब्ध करून देण्यात येतात. तसेच मोठ्या संख्येने भाविक या पूजांसाठी ऑनलाईन पद्धतीने नोंदणी करत आहेत.

विठ्ठल आणि रखुमाईची विविध पूजा करण्यात येतात. पूर्वी समक्ष मंदिरात येऊन पूजेची नोंदणी करावी लागत होती. मात्र राज्यासह इतर राज्यांतील भाविकांच्या अडचणी लक्षात घेता. मंदिर समितीने संगणक प्रणाली विकसित केली आहे. भाविकांना पूजेची नोंदणी https://www. vitthalrukminimandir.org या मंदिर समितीच्या अधिकृत संकेतस्थळावरून करता येणार आहे.

दरम्यान, यापूर्वी दोन टप्प्यांत अशा प्रकारची नोंदणी केली होती. त्याला भाविकांनी भरभरून प्रतिसाद दिला होता. आता तिसऱ्या टप्प्यात १ एप्रिल ते ३१ जुलै कालावधीतील सण, उत्सव व गर्दीचे दिवस वगळून इतर दिवशीच्या श्रींच्या नित्यपूजा, तुळशी अर्चन पूजा, पाद्यपूजा व चंदनउटी पूजा ऑनलाइन नोंदणीसाठी भाविकांना उपलब्ध करून देण्यात येत आहेत. येत्या २५ मार्च रोजी सकाळी ११ वाजलेपासून ऑनलाईन नोंदणी सुरू होत आहे.

श्री विठ्ठल आणि रुक्मिणी मातेच्या पूजेसाठी देणगी मूल्य घेण्यात येते. पूजेनुसार ते वेगवेगळे आहे. श्री विठ्ठलाच्या नित्यपूजेसाठी २५ हजार, रुक्मिणी मातेच्या पूजेसाठी ११ हजार रुपये तर पाद्यपूजेसाठी ५ हजार रुपये देणगी मूल्य आहे. तुळशी अर्चन पूजेसाठी २१०० रुपये तर श्री विठ्ठल व रखुमाईच्या चंदनउटी पूजेसाठी अनुक्रमे २१ हजार व ९ हजार रुपये एवढे देणगी मूल्य आहे.