मेट्रो प्रवाशांसाठी मोठी बातमी! मुंबई, पुणे, नागपूरमधील स्थानकांची नावे बदलणार? सरकारचा मोठा निर्णय

पुणे : महाराष्ट्रातील मुंबई, पुणे आणि नागपूर या प्रमुख शहरांमधील मेट्रो स्थानकांच्या नावांमध्ये बदल होण्याची शक्यता निर्माण झाली आहे. राज्य सरकारने मेट्रो स्थानकांच्या नामकरणाचा आढावा घेण्यासाठी विशेष समिती स्थापन करण्याचा निर्णय घेतला आहे. या समितीच्या माध्यमातून सध्याच्या स्थानकांच्या नावांचा पुनर्विचार केला जाणार असून, आवश्यकतेनुसार नवीन नावे सुचवली जाणार आहेत. त्यामुळे आगामी काळात प्रवाशांना काही मेट्रो स्थानकांची बदललेली नावे पाहायला मिळू शकतात.
मुख्यमंत्री देवेंद्र फडणवीस समितीचे अध्यक्ष


मेट्रो स्थानकांच्या नामकरणासाठी स्थापन करण्यात आलेल्या विशेष समितीचे अध्यक्ष मुख्यमंत्री देवेंद्र फडणवीस असणार आहेत. तर नगरविकास विभागाचे उपमुख्यमंत्री सह-अध्यक्ष म्हणून काम पाहतील. याशिवाय संबंधित भागातील खासदार, आमदार आणि स्थानिक स्वराज्य संस्थांच्या प्रतिनिधींचाही समितीत समावेश करण्यात आला आहे. मेट्रो प्रकल्पांची अंमलबजावणी करणाऱ्या संस्थांचे प्रशासकीय प्रमुख सदस्य सचिव म्हणून जबाबदारी सांभाळतील.

या समितीच्या माध्यमातून मुंबई, पुणे आणि नागपूरमधील मेट्रो स्थानकांच्या नावांचा आढावा घेतला जाणार आहे.

मेट्रो स्थानकांची नावे ठरवताना कोणते निकष पाहणार?
स्थानकांना नवीन नावे देताना संबंधित परिसराची मूळ ओळख जपण्यावर भर दिला जाणार आहे. यामध्ये परिसराचा इतिहास, सांस्कृतिक वारसा, भौगोलिक वैशिष्ट्ये आणि स्थानिक नागरिकांच्या भावना विचारात घेतल्या जातील. तसेच स्थानकांची नावे प्रवाशांना सहज समजणारी आणि उच्चारायला सोपी असावीत, याचीही काळजी घेतली जाणार आहे.
एकाच नावामुळे प्रवाशांमध्ये संभ्रम निर्माण होऊ नये, तसेच नामकरण प्रक्रियेत अनावश्यक राजकीय किंवा धार्मिक वाद निर्माण होणार नाहीत, यासाठीही विशेष निकषांचा विचार केला जाणार आहे.
मेट्रो स्थानकांच्या नामकरणाची प्रक्रिया कशी असेल?
संबंधित मेट्रो व्यवस्थापन संस्था सर्वप्रथम स्थानकांच्या नावांबाबतचा प्राथमिक प्रस्ताव राज्य सरकारकडे पाठवेल. त्यानंतर नगरविकास विभाग हा प्रस्ताव मुख्यमंत्री यांच्या अध्यक्षतेखालील समितीसमोर मांडेल. समिती प्रस्तावाचा अभ्यास करून योग्य नावांबाबत शिफारस करेल.
अंतिम निर्णयासाठी प्रस्ताव केंद्र सरकारकडे जाणार
समितीने केलेल्या शिफारशींनंतर नामकरणाचा प्रस्ताव पुढील कार्यवाहीसाठी केंद्र सरकारकडे पाठवण्यात येणार आहे. केंद्र सरकारच्या अंतिम निर्णयानंतरच स्थानकांच्या नावांमध्ये बदल होणार की नाही, हे स्पष्ट होईल.
दरम्यान, मुंबई, पुणे आणि नागपूरमधील नेमक्या कोणत्या मेट्रो स्थानकांची नावे बदलली जाणार, याबाबत अद्याप अधिकृत घोषणा झालेली नाही. त्यामुळे समितीच्या शिफारशींकडे आणि केंद्र सरकारच्या अंतिम निर्णयाकडे प्रवाशांचे लक्ष लागले आहे.
