रिक्षा-टॅक्सी चालकांसाठी मोठी बातमी; मराठी शिकण्यासाठी एक वर्षाची मुदतवाढ, मुख्यमंत्र्यांची मोठी घोषणा
मुंबई : मुंबईसह राज्यातील अमराठी रिक्षा आणि टॅक्सी चालकांना जुजबी मराठी भाषा शिकण्यासाठी आणखी एक वर्षाची मुदत देण्यात आली आहे. मुख्यमंत्री देवेंद्र फडणवीस यांनी गुरुवारी माध्यमांशी संवाद साधताना याबाबतची महत्त्वाची घोषणा केली. त्यामुळे मराठी भाषेच्या नियमामुळे अडचणीत येण्याची शक्यता असलेल्या अमराठी रिक्षा आणि टॅक्सी चालकांना मोठा दिलासा मिळाला आहे.
रिक्षा आणि टॅक्सी चालकांच्या शिष्टमंडळाने मुख्यमंत्री देवेंद्र फडणवीस यांची भेट घेऊन मराठी शिकण्यासाठी अधिक वेळ देण्याची मागणी केली होती. विविध वयोगटातील चालकांना कमी कालावधीत जुजबी मराठी शिकणे शक्य होणार नसल्याचे शिष्टमंडळाने मुख्यमंत्र्यांच्या निदर्शनास आणून दिले. मराठी शिकण्यास आमचा विरोध नसून, त्यासाठी पुरेसा वेळ मिळावा, अशी भूमिका चालकांनी मांडली.
हाजी अराफत यांच्या नेतृत्वाखाली चालकांची भेट
हाजी अराफत यांच्या नेतृत्वाखाली ऑटो आणि रिक्षा चालकांच्या शिष्टमंडळाने मुख्यमंत्र्यांची भेट घेतली. यावेळी चालकांनी जुजबी मराठी शिकण्याच्या निर्णयाला पाठिंबा असल्याचे सांगितले. मराठी शिकण्याचा प्रयत्न सुरू असून भविष्यातही तो सुरूच ठेवू, असे त्यांनी स्पष्ट केले.
मात्र, राज्यातील रिक्षा आणि टॅक्सी चालक वेगवेगळ्या वयोगटातील आहेत. त्यामुळे सर्वांना कमी कालावधीत मराठी भाषा शिकणे शक्य होणार नाही. त्यासाठी किमान एक वर्षाचा अतिरिक्त वेळ द्यावा, अशी मागणी शिष्टमंडळाकडून करण्यात आली.
पुढील वर्षभर कारवाई होणार नाही
या मागणीचा विचार करून अमराठी रिक्षा आणि टॅक्सी चालकांना जुजबी मराठी शिकण्यासाठी एक वर्षाची मुदतवाढ देण्याचा निर्णय घेण्यात आल्याचे मुख्यमंत्री देवेंद्र फडणवीस यांनी सांगितले.
या मुदतवाढीमुळे पुढील एक वर्षाच्या कालावधीत जुजबी मराठी येत नसल्यामुळे संबंधित रिक्षा आणि टॅक्सी चालकांवर कारवाई केली जाणार नाही, असेही मुख्यमंत्र्यांनी स्पष्ट केले आहे.
या एका वर्षाच्या कालावधीत रिक्षा आणि टॅक्सी चालकांना मराठी शिकवण्यासाठी विविध उपक्रम राबवले जाणार आहेत. संबंधित संघटनांकडून मराठी भाषेचे वर्ग घेण्यासोबतच मराठी साहित्याच्या माध्यमातून चालकांना भाषा शिकवण्याचा प्रयत्न केला जाणार आहे.
मुख्यमंत्र्यांनी काय सांगितले?
“रिक्षाचालक आणि ऑटो चालकांचे शिष्टमंडळ माझ्याकडे आले होते. त्यांनी वेळ वाढवून देण्याची विनंती केली. मराठी शिकण्यासाठी त्यांना वेळ देणे आवश्यक होते. त्यामुळे त्यांना एक वर्षाची मुदतवाढ देण्यात आली आहे,” असे मुख्यमंत्री देवेंद्र फडणवीस यांनी सांगितले.
मुख्यमंत्र्यांच्या या निर्णयामुळे राज्यातील अमराठी रिक्षा आणि टॅक्सी चालकांना मोठा दिलासा मिळाला आहे. आता या चालकांना पुढील एक वर्षात जुजबी मराठी शिकणे आवश्यक राहणार असून, त्यानंतर नियमांनुसार पुढील कारवाई केली जाण्याची शक्यता आहे.
