अजित पवारांसमोरच मराठा आरक्षणाच्या बैठकीत मोठा गोंधळ; टेबलवर हात आदळले अन्…
कोल्हापूर : मराठा समाजाला ओबीसी प्रवर्गातून आरक्षण मिळावे या मागणीवर चर्चा करण्यासाठी राज्याचे उपमुख्यमंत्री अजित पवार यांच्या उपस्थितीत कोल्हापुरात बैठक आयोजित करण्यात आली होती. या बैठकीत पुण्यातील कार्यकर्त्यांनी गोंधळ घातल्याची माहिती आहे.
आधी बैठकीत प्रवेश नाकारल्याने तर आत सोडल्यावर बंद खोलीत बैठक का घेतली असा जाब विचारत गोंधळ झाल्याची माहिती आहे. स्वातंत्र्यदिनी कोल्हापूर येथे उपमुख्यमंत्री अजित पवार यांच्या हस्ते ध्वजारोहण करण्यात आले. शासकीय ध्वजारोहणाचा कार्यक्रम झाल्यानंतर या बैठकीचे आयोजन करण्यात आले होते.
या बैठकीसाठी सातारा, पु्णे येथील कार्यकर्ते उशीरा पोहोचल्याने त्यांना पोलिसांनी रोखले. कार्यकर्त्यांनी त्यांना आत सोडण्याची विनंती केली. पण, पोलिसांनी त्याला नकार दिला. आत बसायला जागा नसल्याचे कारण दिले. त्यामुळे येथे गोंधळाची परिस्थिती निर्माण झाली होती.
पंधरा मिनिटांनंतर ही बैठक संपली. बैठक संपल्यानंतर पुण्यातील कार्यकर्ते आत आले आणि अजित पवार यांच्या समोरच गोंधळ घालण्यास सुरुवात केली. गोंधळ वाढत असल्याचे पाहून पोलिसांनी हस्तक्षेप केला.
दरम्यान, एका कार्यकर्त्याने हातातील फाईल पवार यांच्यासमोरच टेबलावर आपटल्या. बंद खोलीत बैठक का घेताय असेही विचारले. यामुळे बैठकीत गोंधळाची परिस्थिती निर्माण झाली होती.
