उरूळी कांचन येथील शिंदवणे रस्त्यावर तरुणावर कोयत्याने वार, तिघांविरुद्ध गुन्हा दाखल..
उरुळी कांचन : उरुळी कांचन (ता. हवेली) येथील शिंदवणे रस्त्यावर दुचाकीवरून आलेल्या अज्ञात तिघांनी एका ३२ र्षीय तरुणावर ऊस तोडण्याच्या कोयत्याने वार केल्याची धक्कादायक घटना समोर आली आहे.
ही घटना उरुळी कांचन ग्रामपंचायत हद्दीतील शिंदवणे- उरुळी कांचन रोडवरील चिंतामणी वॉशिंग सेंटर जवळ बुधवारी सकाळी साडेसहा वाजण्याच्या सुमारास घडली आहे.
निखिल एकनाथ खेडेकर (वय ३२, धंदा खाजगी नोकरी रा. शिंदवणे खेडेकर आळी, ता. हवेली) असे या जीवघेण्या हल्ल्यात जखमी झालेल्या तरुणाचे नाव आहे. त्याच्या फिर्यादीवरून दुचाकीवरून आलेल्या तिघांवर उरुळी कांचन पोलीस ठाण्यात गुन्हा दाखल करण्यात आला आहे.
सविस्तर माहिती अशी की, फिर्यादी निखिल खेडेकर व त्यांचा मित्र सतीश चंद्रकांत वाघमोडे (रा. शिंदवणे) हे दोघेजण बुधवारी सकाळी साडेसहा वाजण्याच्या सुमारास मोटार सायकलवरून शिंदवणे येथून उरुळी कांचनकडे निघाले होते. यावेळी शिंदवणे बाजूकडून अज्ञात तिघेजण हे दुचाकीवर पाठीमागून आले.
यावेळी मध्यभागी बसलेल्या इसमाने निखिल खेडेकर याच्या डोक्यात ऊस तोडणीचे कोयत्याने हल्ला केला. या हल्ल्यात निखिल खेडेकर हा जखमी झाला. तर मोटार सायकलवरील तिघांपैकी एकाने फिर्यादी खेडेकर याला शिविगाळ करुन त्यांच्या ताब्यातील मोटार सायकलसह निघून गेले. याप्रकणी उरुळी कांचन पोलीस ठाण्यात गुन्हा दाखल करण्यात आला आहे.
