भरदिवसा घरात घुसले, मुलांसमोरच आईला उचललं अन् दोन गाड्यांतून आरोपी फरार! बीडमध्ये थरार, रायमोहा परिसरात पोलिसांनी अखेर काय केलं?


बीड : बीड जिल्ह्यातील चऱ्हाटा फाटा परिसरात भरदिवसा घडलेल्या अपहरणाच्या घटनेने खळबळ उडाली आहे. दोन चारचाकी वाहनांतून आलेल्या चार जणांनी थेट घरात घुसून ३५ वर्षीय महिलेला जबरदस्तीने पळवून नेलं. यावेळी महिलेच्या दोन लहान मुलांनी विरोध केला असता आरोपींनी त्यांनाही मारहाण केली. मुलांना जीवे मारण्याची धमकी देत आरोपींनी महिलेला वाहनात बसवलं आणि घटनास्थळावरून पळ काढला. घटनेची माहिती मिळताच पोलिसांनी तपास सुरू केला आणि अखेर शिरूर कासार तालुक्यातील रायमोहा परिसरातून महिलेची सुटका केली.

मिळालेल्या माहितीनुसार, बीड शहरालगत असलेल्या चऱ्हाटा फाटा परिसरात काल दुपारी ही घटना घडली. दोन चारचाकी वाहनांतून चार जण महिलेच्या घरी पोहोचले. घरात प्रवेश करत त्यांनी महिलेला ताब्यात घेण्याचा प्रयत्न केला. मात्र, तिने विरोध केल्यानंतर आरोपींनी तिला मारहाण केली. याचवेळी घरात उपस्थित असलेल्या तिच्या दोन्ही मुलांनाही लक्ष्य करण्यात आलं. मुलांना जीवे मारण्याची धमकी देऊन आरोपींनी महिलेला बळजबरीने गाडीत बसवलं. काही क्षणांतच दोन्ही वाहनं तेथून निघून गेली.

या घटनेची माहिती मिळताच बीड ग्रामीण पोलिसांनी अपहरणकर्त्यांचा शोध घेण्यासाठी तपासाची सूत्रं वेगाने हलवली. आरोपींच्या वाहनांचा माग काढत पोलिसांनी विविध ठिकाणी शोध सुरू केला. तपासादरम्यान संशयितांचा माग शिरूर कासार तालुक्यातील रायमोहा परिसरात लागला. त्यानंतर पोलिसांनी या भागात शोधमोहीम राबवली आणि अपहरण झालेल्या महिलेला आरोपींच्या तावडीतून सोडवलं. या कारवाईमुळे कुटुंबीयांना मोठा दिलासा मिळाला.

दरम्यान, मारहाणीत जखमी झालेल्या महिलेला उपचारासाठी बीड जिल्हा रुग्णालयात दाखल करण्यात आलं आहे. तिच्यावर वैद्यकीय उपचार सुरू आहेत. या प्रकरणी चार जणांविरोधात अपहरणाचा गुन्हा दाखल करण्यात आला आहे. मात्र, दिवसाढवळ्या घरात घुसून हे अपहरण नेमकं कोणत्या कारणातून करण्यात आलं, याचं उत्तर अद्याप स्पष्ट झालेलं नाही. आरोपींचा महिलेच्या कुटुंबाशी काही वाद होता का, या घटनेचं आधीपासून नियोजन करण्यात आलं होतं का आणि यामध्ये आणखी कोणाचा सहभाग आहे का, या सर्व बाजूंनी पोलीस तपास करत आहेत.

दोन वाहनांतून आलेले चार आरोपी, घरात घुसून केलेलं अपहरण आणि चिमुरड्यांना दिलेली जीवे मारण्याची धमकी, या प्रकारामुळे चऱ्हाटा फाटा परिसरात भीतीचं वातावरण निर्माण झालं आहे. महिलेची सुटका झाली असली, तरी अपहरणामागील नेमकं रहस्य उलगडण्याकडे आता सर्वांचं लक्ष लागलं आहे.

Views:

[jp_post_view]

Leave a Reply

Your email address will not be published. Required fields are marked *

error: Content is protected !!