भाजपने पत्ते उघडले अन् समीकरणच बदललं! पुणे पदवीधरसाठी स्मिता जाधव मैदानात
पुणे : महाराष्ट्र विधान परिषदेच्या पुणे विभाग पदवीधर मतदारसंघाची निवडणूक आता अधिक रंगतदार होण्याची चिन्हे आहेत. उमेदवारीवरून भाजपमध्ये अनेक दिवसांपासून सुरू असलेल्या चर्चेला अखेर पूर्णविराम मिळाला असून पक्षाने डॉ. स्मिता योगेश जाधव यांच्या नावावर शिक्कामोर्तब केले आहे. भाजपच्या केंद्रीय निवडणूक समितीने रविवारी, ४ ऑक्टोबर रोजी उमेदवारांची अधिकृत घोषणा केली. त्यामुळे पुणे पदवीधर मतदारसंघाच्या राजकीय मैदानात आता भाजपकडून डॉ. स्मिता जाधव यांची एन्ट्री झाली आहे.
या उमेदवारीमुळे भाजपच्या अंतर्गत इच्छुकांमध्ये सुरू असलेल्या रस्सीखेचीलाही अखेर विराम मिळाला आहे. पुणे पदवीधर मतदारसंघासाठी शरद लाड आणि डॉ. मिलिंद संपगावकर यांच्यासह काही नावांची चर्चा सुरू होती. विशेषतः शरद लाड यांच्या नावाची जोरदार चर्चा असल्याने पक्षाचा अंतिम निर्णय कोणाच्या बाजूने झुकतो, याकडे राजकीय वर्तुळाचे लक्ष लागले होते. मात्र भाजपने अपेक्षित नावाला बाजूला ठेवत डॉ. स्मिता जाधव यांना संधी दिल्याने पक्षाच्या निर्णयाची चर्चा सुरू झाली आहे.
डॉ. स्मिता जाधव या शिक्षण क्षेत्राशी संबंधित असून डॉ. डी. वाय. पाटील विद्यापीठाच्या प्र-कुलगुरू तसेच संबंधित विद्यापीठ संस्थेच्या विश्वस्त सचिव म्हणून कार्यरत आहेत. मुंबई, पुणे आणि कोल्हापूरसह विविध भागांमध्ये या शैक्षणिक संस्थेचे मोठे जाळे आहे. त्यामुळे शिक्षण क्षेत्रातील अनुभव आणि पदवीधरांशी असलेला संपर्क हा त्यांच्या उमेदवारीतील महत्त्वाचा पैलू मानला जात आहे.
दरम्यान, पुणे पदवीधरची जागा कोणत्या पक्षाच्या वाट्याला जाणार, यावर महायुतीमध्येही काही दिवसांपासून खलबते सुरू होती. राष्ट्रवादी काँग्रेसच्या अजित पवार गटाकडून या जागेवर दावा करण्यात आला होता. मात्र भाजपने पुणे पदवीधर तसेच पुणे शिक्षक या दोन्ही जागा लढवण्याची तयारी कायम ठेवली होती. अखेर जागावाटपात पुणे पदवीधरची जागा भाजपकडे राहिली आणि त्यानंतर उमेदवाराच्या नावाचीही घोषणा करण्यात आली.
भाजपने पुणे शिक्षक मतदारसंघातून कौस्तुभ मुरलीधर गावडे यांना उमेदवारी दिली आहे. तर नागपूर विभाग पदवीधर मतदारसंघातून सुधाकर विठ्ठलराव कोहळे यांना मैदानात उतरवण्यात आले आहे. म्हणजेच पुण्यातील पदवीधर आणि शिक्षक अशा दोन्ही मतदारसंघांमध्ये भाजपने आपले पत्ते खुले केले आहेत.
या निवडणुकीचे वेळापत्रकही जाहीर झाले आहे. २९ सप्टेंबर रोजी निवडणुकीची अधिसूचना प्रसिद्ध झाली असून उमेदवारी अर्ज दाखल करण्याची अंतिम तारीख ६ ऑक्टोबर आहे. ७ ऑक्टोबर रोजी अर्जांची छाननी होणार आहे, तर ९ ऑक्टोबरपर्यंत उमेदवारी अर्ज मागे घेता येणार आहेत. २३ ऑक्टोबर रोजी सकाळी ८ ते दुपारी ४ या वेळेत मतदान होईल आणि २७ ऑक्टोबर रोजी मतमोजणी होऊन निकाल जाहीर केला जाणार आहे.
पुणे पदवीधर मतदारसंघातील ही निवडणूक केवळ पक्षीय प्रतिष्ठेची नसून पदवीधरांचे प्रश्न, शिक्षण, रोजगार आणि तरुणांच्या अपेक्षा यांसारखे मुद्देही महत्त्वाचे ठरणार आहेत. भाजपने आपला उमेदवार जाहीर केल्यानंतर आता विरोधक कोणता चेहरा मैदानात उतरवतात, याकडे लक्ष लागले आहे. त्यामुळे डॉ. स्मिता जाधव यांच्या उमेदवारीनंतर पुणे पदवीधरची लढत नेमकी कोणत्या समीकरणांवर रंगते, हे पाहणे महत्त्वाचे ठरणार आहे.
भाजपने उमेदवारीचा निर्णय जाहीर करून आपली भूमिका स्पष्ट केली असली, तरी निवडणुकीच्या मैदानात अंतिम चित्र उमेदवारी अर्ज मागे घेण्याची मुदत संपल्यानंतरच स्पष्ट होणार आहे. त्यामुळे पुढील काही दिवसांत कोणते नवे राजकीय समीकरण तयार होते आणि कोणाकोणामध्ये थेट सामना होतो, याकडे पुणे विभागातील राजकीय वर्तुळाचे लक्ष लागले आहे.
