बारामतीत गूढ मृत्यूंचं कोडं! रात्रभर बंद घरात नेमकं काय घडलं? सकाळी पती घरी पोहोचला अन् समोर होतं हृदय पिळवटून टाकणारं दृश्य
बारामती : पुणे जिल्ह्यातील बारामती तालुक्यात शुक्रवारी सकाळी उघडकीस आलेल्या एका रहस्यमय घटनेने संपूर्ण परिसर हादरून गेला आहे. तांदूळवाडी येथील दादा पाटीलनगरमध्ये एका घरातून आई आणि अल्पवयीन मुलाचे मृतदेह आढळून आल्याने नागरिकांमध्ये भीती आणि संभ्रमाचे वातावरण निर्माण झाले आहे. रात्रीपर्यंत सर्व काही सुरळीत असताना पहाटेच्या सुमारास घडलेल्या या घटनेमुळे अनेक प्रश्न उपस्थित होत आहेत.
मृतांमध्ये रमा विजय गावडे (वय ४१) आणि त्यांचा मुलगा विवेक गावडे (वय १७) यांचा समावेश आहे. कुटुंबप्रमुख विजय गावडे हे बारामती एमआयडीसीतील खासगी कंपनीत काम करतात. कामानिमित्त ते गुरुवारी रात्री घराबाहेर होते. शुक्रवारी सकाळी घरी परतल्यानंतर त्यांनी दरवाजा ठोठावला. मात्र, पत्नी आणि मुलाकडून कोणताही प्रतिसाद न मिळाल्याने त्यांची चिंता वाढली. काही वेळ प्रयत्न करूनही दरवाजा न उघडल्याने त्यांनी शेजाऱ्यांची मदत घेतली.
दरवाजा उघडल्यानंतर घरातील परिस्थिती पाहून सर्वांनाच धक्का बसला. घराच्या वेगवेगळ्या भागात आई आणि मुलगा निश्चल अवस्थेत पडलेले दिसून आले. तातडीने दोघांना रुग्णालयात हलवण्यात आले, मात्र डॉक्टरांनी तपासणीनंतर त्यांना मृत घोषित केले. या घटनेची माहिती मिळताच बारामती तालुका पोलीस घटनास्थळी दाखल झाले आणि परिसर सील करून तपासाला सुरुवात केली.
प्राथमिक तपासात काही संशयास्पद बाबी समोर आल्याने पोलिसांनी या प्रकरणाकडे गांभीर्याने पाहण्यास सुरुवात केली आहे. घरातील परिस्थिती, कुटुंबीयांचे संबंध, अलीकडील घडामोडी तसेच मोबाईल कॉल रेकॉर्ड आणि इतर तांत्रिक पुरावे तपासले जात आहेत. मृत्यूमागे आत्महत्या, अपघात की अन्य काही कारण आहे, याबाबत अद्याप अधिकृत माहिती समोर आलेली नाही.
शवविच्छेदन अहवालानंतरच मृत्यूचे नेमके कारण स्पष्ट होणार असल्याचे पोलिसांनी सांगितले आहे. दरम्यान, परिसरातील नागरिकांनी गावडे कुटुंब शांत आणि कुणाशीही वाद नसलेले असल्याचे सांगितले. त्यामुळे अचानक घडलेल्या या घटनेने अनेकांना धक्का बसला आहे.
सध्या या दुहेरी मृत्यूचे गूढ उकलण्यासाठी पोलिसांकडून कसून चौकशी सुरू असून, बारामतीसह संपूर्ण पुणे जिल्ह्याचे लक्ष आता या तपासाच्या निष्कर्षाकडे लागले आहे.
