इथेनॉलच्या चर्चेनंतर पेट्रोल-डिझेलच्या दरात बदल? आजचे दर पाहून घ्या अपडेट

मुंबई : पेट्रोल आणि डिझेलच्या दरांचा थेट परिणाम सर्वसामान्यांच्या दैनंदिन खर्चावर होत असतो. इंधनाच्या किमती वाढल्या की वाहतूक खर्चासह अनेक वस्तू आणि सेवांच्या किमतींवरही त्याचा परिणाम होतो. त्यामुळे दररोज जाहीर होणाऱ्या पेट्रोल-डिझेलच्या किमतींकडे नागरिकांचे लक्ष असते.

आज शनिवार, 22 ऑगस्ट रोजी देशातील तेल कंपन्यांनी पेट्रोल आणि डिझेलचे नवीन दर जाहीर केले आहेत. आजही इंधनाच्या दरात कोणताही बदल करण्यात आलेला नाही. देशातील प्रमुख शहरांमध्ये पेट्रोल आणि डिझेलचे दर स्थिर आहेत.

मुंबईत आज पेट्रोल 111.21 रुपये प्रति लिटर, तर डिझेल 97.83 रुपये प्रति लिटर दराने विकले जात आहे. राजधानी दिल्लीत पेट्रोलचा दर 102.12 रुपये असून डिझेल 95.20 रुपये प्रति लिटर आहे.

पेट्रोल-डिझेलच्या दरात शेवटची मोठी वाढ 25 मे रोजी झाली होती. त्यावेळी पेट्रोलच्या दरात प्रति लिटर 2.61 रुपये, तर डिझेलच्या दरात 2.71 रुपयांची वाढ करण्यात आली होती. त्यानंतर देशातील प्रमुख शहरांमध्ये इंधनाचे दर मोठ्या प्रमाणात स्थिर राहिले आहेत.

इथेनॉलमुळे साखर महागली? सरकारने काय सांगितलं?

दरम्यान, पेट्रोलमध्ये इथेनॉल मिसळण्याच्या धोरणामुळे साखरेच्या किमती वाढत असल्याचा दावा चर्चेत आहे. मात्र, सरकारने हा दावा फेटाळून लावला आहे. सरकारच्या म्हणण्यानुसार, इथेनॉल निर्मितीसाठी साखरेचा वापर उलट कमी होत आहे.

2022-23 मध्ये साखरेच्या उत्पादनातील सुमारे 12 टक्के हिस्सा इथेनॉल निर्मितीसाठी वापरला जात होता. 2025-26 मध्ये हा हिस्सा सुमारे 9 टक्क्यांपर्यंत कमी होण्याचा अंदाज आहे.

याशिवाय, देशातील जवळपास 75 टक्के इथेनॉल आता धान्यांपासून, विशेषतः मक्यापासून तयार केले जाते. त्यामुळे साखरेच्या किमती वाढण्यासाठी केवळ इथेनॉल धोरणाला जबाबदार धरता येणार नाही, असे सरकारचे म्हणणे आहे.

साखरेच्या दरवाढीमागे अनेक कारणे

सरकारच्या मते, देशांतर्गत साखरेचे अपेक्षेपेक्षा कमी उत्पादन, सणासुदीपूर्वी वाढलेली मागणी, हवामानातील बदलामुळे ऊस पिकाचे झालेले नुकसान, जागतिक बाजारातील पुरवठ्याची कमतरता तसेच साठेबाजी आणि सट्टेबाजी यांसारख्या अनेक कारणांमुळे साखरेच्या किमती वाढल्या आहेत.

भारतात दरवर्षी साधारण 320 ते 340 लाख मेट्रिक टन साखरेचे उत्पादन होते. त्याचवेळी देशांतर्गत साखरेची मागणी सुमारे 280 ते 290 लाख मेट्रिक टन असल्याचे सरकारने स्पष्ट केले आहे.

दरम्यान, पेट्रोल-डिझेलचे दर आज स्थिर असले तरी आंतरराष्ट्रीय बाजारातील कच्च्या तेलाच्या किमती, रुपयाचे मूल्य आणि इतर आर्थिक घटकांवर आगामी काळातील इंधन दर अवलंबून राहणार आहेत.