पुरंदर विमानतळ: शेतकऱ्यांसाठी पैशांचा पाऊस; एकरी 2 कोटी, नोकरीचीही हमी!
पुणे : प्रस्तावित पुरंदर आंतरराष्ट्रीय विमानतळासाठी राज्य सरकारने भूसंपादनाची मोठी आणि ऐतिहासिक घोषणा केली आहे. पुण्याचे जिल्हाधिकारी जितेंद्र डुडी यांनी सांगितले की, प्रत्येक एकरामागे सरासरी 2 कोटी रुपये शेतकऱ्यांच्या खात्यात जमा केले जाणार आहेत. या प्रकल्पामुळे सात गावांमधील 1,216 हेक्टर आणि इतर 242 एकर जमीन अधिग्रहित केली जाणार आहे.
जिल्हाधिकाऱ्यांनी स्पष्ट केले की, शेतकऱ्यांना व्याजासहित एक एकरासाठी 1 कोटी 61 लाख 1 हजार 925 रुपये इतका दर मिळाला आहे. फळबाग जमीन असल्यास दुप्पट मोबदला, तर विहीर किंवा बोअरवेल असल्यास त्याची स्वतंत्र किंमत दिली जाणार आहे. त्यामुळे सरासरी प्रत्येक शेतकऱ्याला सुमारे 2 कोटी रुपये मिळणार आहेत.
या घोषणेमुळे काही शेतकऱ्यांच्या डोळ्यात अश्रू तर काहींच्या मनात भविष्याबद्दल आशा दिसत आहे. “ही जमीन फक्त माती नाही, आमच्या पिढ्यांचा घाम आहे,” अशी भावना अनेक शेतकऱ्यांनी व्यक्त केली.
सरकारने आणखी मोठी घोषणा करत सांगितले की, घेतलेल्या जमिनीपैकी 10 टक्के विकसित भूखंड शेतकऱ्यांना परत दिला जाईल. ज्यांचे घर जाणार आहे त्यांना अतिरिक्त अडीच गुंठे जमीन घरासाठी मिळणार आहे. भूमिहीन शेतकऱ्यांना 750 दिवसांचे वेतन आणि कुटुंबातील एका व्यक्तीला विमानतळावर नोकरी देण्याचीही हमी देण्यात आली आहे.
जिल्हाधिकाऱ्यांनी सांगितले की, 7 मे पासून प्रक्रिया सुरू होणार असून 10 जूनपर्यंत सहमती घेण्यात येईल. सहमती नसल्यास सक्तीने भूसंपादन केले जाईल. तसेच सर्व रक्कम थेट बँक खात्यात जमा होणार आहे.
पुरंदर विमानतळाचे काम तीन वर्षांत पूर्ण करण्याचे नियोजन आहे. ऑक्टोबर-नोव्हेंबरमध्ये प्रत्यक्ष काम सुरू होणार आहे.
दरम्यान, या प्रकल्पावर गैरसमज पसरवू नयेत असे आवाहन प्रशासनाने केले असून, बनावट पत्रांवर कारवाईचे आदेश देण्यात आले आहेत. महिला बचत गटांसाठीही व्यवसायाच्या संधी उपलब्ध करून देण्यात येणार आहेत.
ही फक्त जमीन संपादनाची प्रक्रिया नाही, तर शेतकऱ्यांच्या आयुष्यातील मोठा बदल ठरणारी एक भावनिक आणि ऐतिहासिक घडामोड ठरत आहे.
