‘4 हजारांचा डबल डोस’ मिळणार? 90 लाख शेतकऱ्यांसाठी मोठी घडामोड; ‘नमो शेतकरी’च्या प्रलंबित हप्त्यावर सरकारचा मोठा निर्णय लवकरच?

मुंबई : राज्यातील लाखो शेतकऱ्यांसाठी पुढील काही दिवस महत्त्वाचे ठरण्याची शक्यता आहे. केंद्र सरकारकडून पीएम किसान सन्मान निधी योजनेचा हप्ता मिळाल्यानंतर आता महाराष्ट्र सरकारच्या ‘नमो शेतकरी महासन्मान निधी’ योजनेच्या प्रलंबित आठव्या हप्त्याकडे सर्वांचे लक्ष लागले आहे. राज्यभरातील सुमारे 90 लाख पात्र शेतकरी या निधीची प्रतीक्षा करत असून, आठवा आणि नववा हप्ता एकत्र देण्याबाबत सरकार सकारात्मक निर्णय घेऊ शकते, अशी चर्चा प्रशासनाच्या वर्तुळात सुरू आहे.

‘नमो शेतकरी महासन्मान निधी’ ही योजना राज्यातील शेतकऱ्यांना आर्थिक आधार देण्यासाठी सुरू करण्यात आली आहे. या योजनेत पात्र लाभार्थ्यांना दरवर्षी 6 हजार रुपयांची मदत दिली जाते. ही मदत 2 हजार रुपयांच्या तीन समान हप्त्यांमध्ये थेट बँक खात्यात डीबीटीद्वारे जमा केली जाते. यंदाचा पहिला हप्ता वितरित झाला असला तरी पुढील हप्ता अद्याप लाभार्थ्यांच्या खात्यात जमा झालेला नाही. त्यामुळे शेतकऱ्यांमध्ये उत्सुकता वाढली आहे.

दरम्यान, काही दिवसांपूर्वी केंद्र सरकारने पीएम किसान योजनेचा 2 हजार रुपयांचा हप्ता वितरित केला. त्यामुळे आता राज्य सरकारकडूनही नमो शेतकरी योजनेचा निधी लवकरच वितरित होईल, अशी अपेक्षा व्यक्त होत आहे. सूत्रांच्या माहितीनुसार, स्वातंत्र्यदिन किंवा रक्षाबंधनाच्या निमित्ताने शेतकऱ्यांना दिलासा देण्यासाठी सरकार हप्ता जाहीर करू शकते. याचवेळी आठवा आणि नववा हप्ता एकत्र मंजूर झाल्यास पात्र शेतकऱ्यांच्या खात्यात एकाच व्यवहारात 4 हजार रुपये जमा होण्याची शक्यता वर्तवली जात आहे.

मात्र, या संदर्भात सरकारकडून अद्याप कोणतीही अधिकृत घोषणा करण्यात आलेली नाही. त्यामुळे 4 हजार रुपये जमा होणार, ही बाब सध्या केवळ शक्यतेच्या स्वरूपातच पाहिली जात आहे. अंतिम निर्णय आणि निधी वितरणाची तारीख जाहीर झाल्यानंतरच याबाबत स्पष्ट चित्र समोर येणार आहे.

हप्ता मंजूर झाला आहे की नाही, हे जाणून घेण्यासाठी शेतकऱ्यांनी ‘नमो शेतकरी महासन्मान निधी’च्या अधिकृत पोर्टलवर जाऊन नोंदणीकृत मोबाईल क्रमांकाद्वारे लॉगिन करावे. लाभार्थी स्थिती, हप्ता मंजुरी आणि बँक खात्यात निधी जमा झाल्याची माहिती तेथून सहज तपासता येते.

सरकारच्या अधिकृत घोषणेपूर्वी सोशल मीडियावर फिरणाऱ्या संदेशांवर विश्वास न ठेवण्याचे आवाहनही करण्यात येत आहे. मात्र, जर आठवा आणि नववा हप्ता एकत्र वितरित करण्याचा निर्णय झाला, तर खरीप हंगामात राज्यातील लाखो शेतकऱ्यांना मोठा आर्थिक दिलासा मिळणार, यात शंका नाही.