‘शरद पवारांच्या खासदाराची अमित शाहांसोबत बंद दाराआड भेट; ‘त्या’ पत्राने दिल्लीपासून महाराष्ट्रापर्यंत राजकीय खळबळ’
नवी दिल्ली : महाराष्ट्राच्या राजकारणात सुरू असलेल्या घडामोडींमध्ये आणखी एका महत्त्वाच्या भेटीची भर पडली आहे. राष्ट्रवादी काँग्रेस (शरद पवार गट)चे बीडचे खासदार बजरंग सोनवणे यांनी केंद्रीय गृहमंत्री अमित शाह यांची नवी दिल्लीत भेट घेतल्यानंतर राजकीय वर्तुळात चर्चांना उधाण आले आहे. ही भेट केवळ बीड जिल्ह्यातील प्रश्नांसाठी होती की त्यामागे भविष्यातील राजकीय समीकरणांचे संकेत दडले आहेत, याबाबत विविध स्तरांवर तर्कवितर्क सुरू झाले आहेत.
गेल्या काही दिवसांपासून राज्याच्या राजकारणात मोठ्या घडामोडी घडत आहेत. ठाकरे गटातील सहा खासदारांनी बंडखोरी केल्यानंतर विरोधी पक्षांतील आणखी काही नेते सत्ताधारी आघाडीच्या संपर्कात असल्याच्या चर्चा रंगत आहेत. त्याचवेळी शरद पवार यांच्या नेतृत्वाखालील राष्ट्रवादी काँग्रेस भविष्यात एनडीएत सहभागी होऊ शकते, अशाही चर्चा सुरू आहेत. पक्षातील वरिष्ठ नेत्यांनी या शक्यता नाकारल्या असल्या तरी दिल्लीतील वाढत्या भेटीगाठींमुळे राजकीय वातावरण अधिकच तापले आहे.
या पार्श्वभूमीवर बजरंग सोनवणे यांची अमित शाह यांच्यासोबत झालेली भेट विशेष महत्त्वाची मानली जात आहे. या भेटीत सोनवणे यांनी बीड जिल्ह्यातील कायदा-सुव्यवस्था, विशेषतः बीड जिल्हा कारागृहातील कथित गैरप्रकारांचा मुद्दा उपस्थित केला. त्यांनी अमित शाह यांना सविस्तर निवेदन देत कारागृहातील गंभीर तक्रारींकडे लक्ष वेधले.
सोनवणे यांनी दिलेल्या पत्रात काही कैद्यांना मोबाईल फोन, प्रतिबंधित वस्तू आणि नियमबाह्य विशेष सुविधा पुरवल्या जात असल्याचा आरोप करण्यात आला आहे. इतकेच नव्हे तर कारागृह प्रशासनातील काही अधिकाऱ्यांच्या भूमिकेवरही प्रश्नचिन्ह उपस्थित करण्यात आले आहे. या संपूर्ण प्रकरणाची स्वतंत्र, निष्पक्ष आणि उच्चस्तरीय चौकशी करून दोषींवर कठोर कायदेशीर व प्रशासकीय कारवाई करण्याची मागणी त्यांनी केली आहे. महाराष्ट्र सरकारने या प्रकरणाचा सविस्तर अहवाल सादर करावा, अशीही मागणी निवेदनात करण्यात आली आहे.
या भेटीपूर्वी राष्ट्रवादीच्या कार्याध्यक्ष सुप्रिया सुळे यांनीही अमित शाह यांची दिल्लीत भेट घेतली होती. त्या वेळी बजरंग सोनवणे त्यांच्यासोबत उपस्थित होते. यानंतर सुप्रिया सुळे आणि शरद पवार यांनी पंतप्रधान नरेंद्र मोदी यांची घेतलेली भेटही चर्चेचा विषय ठरली. या सलग भेटींमुळे विरोधी पक्षांतील राजकीय समीकरणांमध्ये काही बदल होणार का, याबाबत चर्चा अधिक तीव्र झाली आहे.
मात्र, अमित शाह आणि बजरंग सोनवणे यांच्या ताज्या भेटीत राजकीय विषयांवर चर्चा झाली की नाही, याबाबत कोणतीही अधिकृत माहिती समोर आलेली नाही. त्यामुळे या भेटीचा केंद्रबिंदू बीड कारागृहातील गंभीर तक्रारी होत्या की त्यापलीकडेही काही राजकीय संदेश दडले आहेत, याबाबत उत्सुकता कायम आहे.
आता सोनवणे यांनी उपस्थित केलेल्या आरोपांची दखल केंद्र सरकार आणि महाराष्ट्र शासन कशा पद्धतीने घेते, बीड कारागृहातील कथित गैरप्रकारांची चौकशी सुरू होते का आणि या भेटीनंतर महाराष्ट्राच्या राजकारणात आणखी कोणते नवे राजकीय समीकरण आकार घेते, याकडे सर्वांचे लक्ष लागले आहे.
