शरद पवार गटाला मोठा धक्का! पुणे जिल्ह्यातील माजी आमदार करणार अजित पवार गटात प्रवेश..
दौंड : गेल्या अनेक दिवसांपासून दौंडचे माजी आमदार व पुणे जिल्हा बँकेचे माजी अध्यक्ष रमेश थोरात राष्ट्रवादी काँग्रेसमध्ये प्रवेश करणार असल्याची चर्चा होती. विधिमंडळाचे पावसाळी अधिवेशन संपल्यानंतर ते अधिकृत प्रवेश करणार असल्याचे बोलले जात होते.
विधानसभा निवडणुकीमध्ये राष्ट्रवादी काँग्रेस शरदचंद्र पवार पक्षातून उमेदवारी घेऊन त्यांनी आमदार राहुल कुल यांच्या विरोधात निवडणूक लढवली होती. मात्र या निवडणुकीमध्ये रमेश थोरात यांचा पराभव झाला.
अशातच आता रमेश थोरात राष्ट्रवादी काँग्रेस शरदचंद्र पवार पक्षाशी फारकत घेत राष्ट्रवादी काँग्रेस अजित पवार गटात प्रवेश करणार असल्याचे निश्चित झाले आहे. उपमुख्यमंत्री व राष्ट्रवादीचे राष्ट्रीय अध्यक्ष अजित पवार यांच्या उपस्थितीमध्ये ते आपल्या समर्थकांसह राष्ट्रवादीमध्ये प्रवेश करणार आहेत. त्यामुळे थोरात यांचा पक्षप्रवेश शरद पवार गटाला धक्का देणारा ठरणार आहे.
रमेश थोरात यांचे दौंड तालुक्यातील विविध संस्थांवर वर्चस्व आहे. गेल्या अनेक वर्षांपासून अजित पवारांना खंबीर साथ देणारे रमेश थोरात यांनी विधानसभा निवडणुकीमध्ये उमेदवारी मिळणार नसल्याचे लक्षात घेऊन शरद पवार गटाला साथ दिली होती.
दौंड तालुक्यातील वरवंड या ठिकाणी १ ऑगस्ट रोजी सायंकाळी चार वाजता उपमुख्यमंत्री अजित पवार यांच्या प्रमुख उपस्थितीमध्ये होणाऱ्या जाहीर सभेत रमेश थोरात आपल्या समर्थकांसह राष्ट्रवादी काँग्रेसमध्ये प्रवेश करणार आहेत.
दरम्यान या प्रवेशासंदर्भात थोरात यांच्या कार्यकर्त्यांसोबत बैठका देखील सुरू आहेत. रमेश थोरात यांचा राष्ट्रवादी काँग्रेस अजित पवार गटामध्ये होणारा प्रवेश महाविकास आघाडीला देखील धक्कादायक मानला जात आहे.
