Lok Sabha Election Result 2024 : उद्या ठरणार पुणे जिल्ह्यातील चार कारभारी, पुण्यात लोकसभेची मतमोजणीसाठी यंत्रणा सज्ज…

Lok Sabha Election Result 2024 : लोकसभा निवडणूक २०२४ ची मतदान प्रक्रिया सात टप्प्यात पूर्ण झाली. त्यानंतर आता उद्या मंगळवारी ४ जून रोजी निवडणूक निकाल येणार आहेत. देशात सर्वच ठिकाणी निवडणुकीची तयारी पूर्ण झाली आहे. महाराष्ट्रातील ४८ मतदार संघातही मतमोजणी होणार आहे.

महाराष्ट्रातील ४८ लोकसभा मतदारसंघात महायुती आणि महाविकास आघाडी किती जागांवर विजय मिळवेल याचा फैसला उद्या होणार असुन जिल्ह्यातील पुणे,बारामती, शिरूर, मावळ, या चार लोकसभा मतदार संघाच्या निकालाकडे लक्ष लागले आहे.

दरम्यान उद्या च्या ४ जून रोजी होत असलेल्या मतमोजणीसाठी निवडणूक यंत्रणा सज्ज झाली आहे, अशी माहिती जिल्हाधिकारी तथा जिल्हा निवडणूक अधिकारी डॉ. सुहास दिवसे यांनी दिली.

बारामती आणि पुणे लोकसभा मतदार संघांची मतमोजणी कोरेगाव पार्क येथील भारतीय अन्न महामंडळाच्या गोदामामध्ये, शिरुर लोकसभा मतदार संघाची मतमोजणी रांजणगाव, ता. शिरुर येथील महाराष्ट्र औद्योगिक वखार महामंडळाच्या गोदामामध्ये तर मावळ लोकसभा मतदार संघाची मतमोजणी शिवछत्रपती क्रीडा संकुल बालेवाडी येथील वेटलिफ्टिंग हॉलमध्ये होणार आहे.

सकाळी ईव्हीएम यंत्रे आणि टपाली मतपेट्या ठेवलेल्या सुरक्षा कक्षांचे (स्ट्राँग रुम) सील निवडणूक निरीक्षक, निवडणूक निर्णय अधिकारी आदी तसेच उमेदवार आणि उमेदवारांचे प्रतिनिधी यांच्या उपस्थितीत काढल्यानंतर आवश्यक ती प्रक्रिया करुन मतमोजणीला प्रारंभ केला जाईल. प्रारंभी सकाळी ८ वाजता टपाली मतदान आणि ईटीपीबीएस मतांची मोजणी सुरू होईल. Lok Sabha Election Result 2024

ईव्हीएमच्या मतमोजणीची सुरूवात ८ वाजून ३० मिनिटांनी होईल. मतमोजणी कक्षातील सर्व कामकाजाचे सीसीटीव्हीद्वारे संपूर्ण रेकॉर्डिंग करण्यात येणार असून याशिवाय व्हिडीओ कॅमेराद्वारेही चित्रीकरण करण्यात येणार आहे.

मतमोजणी केंद्रात मोबाईल आणण्यास मनाई..

निवडणूकीच्या मतमोजणीची फेरीनिहाय आकडेवारी मतमोजणी केंद्राच्या ठिकाणाहून ध्वनीक्षेपकाद्वारे वेळोवेळी घोषित केली जाईल. मतमोजणी केंद्रामध्ये उमेदवार, निवडणूक प्रतिनिधी तसेच मतमोजणी प्रतिनिधी यांना मोबाईल सोबत बाळगण्यास सक्त मनाई करण्यात आली आहे. वैध ओळखपत्र नसलेल्या कुठल्याही अनधिकृत व्यक्तीला मतमोजणी कक्षात प्रवेश दिला जाणार नाही.

मतमोजणीसाठी टेबल आणि फेऱ्यांची रचना…

प्रत्येक लोकसभा मतदार संघात विधानसभा मतदारसंघनिहाय स्वतंत्रपणे मतमोजणी टेबल लावण्यात येणार आहेत. मावळ लोकसभेची मतमोजणी प्रक्रिया ११६, पुणे लोकसभा ११२, बारामती-१२४ व शिरुर लोकसभा निवडणुकीची मतमोजणी प्रक्रिया ११२ टेबलद्वारे होणार आहे. मावळ मधील पनवेल आणि चिंचवड विधानसभा मतदारसंघासाठी प्रत्येकी २४ टेबल लावण्यात येणार असून मतमोजणीसाठी २३ फेऱ्या होणार आहेत.

कर्जत आणि उरण विधानसभा मतदारसंघासाठी प्रत्येकी १४ टेबल आणि २४ फेऱ्या तर मावळ आणि पिंपरी विधानसभा मतदार संघासाठी १६ टेबल लावण्यात येणार मावळसाठी २४ तर पिंपरीसाठी २५ फेऱ्या होणार आहेत. तसेच पोस्टल व ईटीपीबीएस मतमोजणीसाठी ८ टेबल लावण्यात येणार आहेत.

पुणे लोकसभाअंतर्गत वडगाव शेरी २२, शिवाजीनगर, पुणे कॅन्टोंमेंट, कसबा पेठ प्रत्येकी १४, कोथरुड २० तर पर्वती विधानसभा मतदार संघ क्षेत्रासाठी १८ टेबलवर मतमोजणी होणार असून पोस्टल व ईटीपीबीएस मतमोजणीसाठी १० टेबलची व्यवस्था असेल. वडगाव शेरी २१, शिवाजीनगर, कोथरुड, पर्वती, कसबा पेठ व पुणे कॅन्टोंमेंटसाठी प्रत्येकी २० फेऱ्यांमध्ये मतमोजणी होईल.

बारामती लोकसभा मतदार संघातील दौंड मतदारसंघासाठी १४ टेबल व २३ फेऱ्या, इंदापूर १६ टेबल व २१ फेऱ्या, बारामती १८ टेबल व २२ फेऱ्या, पुरंदर २० टेबल व २२ फेऱ्या, भोर २४ टेबल व २४ फेऱ्या तर खडकवासला विधानसभा मतदार संघासाठी २२ टेबल व २४ फेऱ्या होतील.

शिरुर लोकसभा मतदार संघातील जुन्नर मतदारसंघासाठी १४ टेबल व २५ फेऱ्या, आंबेगाव १४ टेबल व २४ फेऱ्या, खेड-आळंदी १६ टेबल व २४ फेऱ्या, शिरुर १६ टेबल व २७ फेऱ्या, भोसरी २० टेबल व २३ फेऱ्या तर हडपसर विधानसभा मतदार संघासाठी २० टेबल व २६ फेऱ्या होतील. पोस्टल व ईटीपीबीएस मतमोजणीसाठी १२ टेबल लावण्यात येणार आहेत.

मतमोजणीसाठी मनुष्यबळाची नियुक्ती..

ईव्हीएम मतमोजणीसाठी एकूण ६५६ मतमोजणी सहायक, ६०० मतमोजणी पर्यवेक्षक आणि ६४० सूक्ष्म निरीक्षक असे एकूण १ हजार ८९६ मनुष्यबळ तर टपाली व ईटीपीबीएस मतमोजणीसाठी ४७ मतमोजणी पर्यवेक्षक, ६९ मतमोजणी सहायक आणि ५८ सूक्ष्म निरीक्षक असे १७४ याप्रमाणे एकूण २ हजार ७० मनुष्यबळ नियुक्त करण्यात आले आहे.

मावळ लोकसभा मतदार संघाच्या ईव्हीएम मतमोजणीसाठी १६२ मतमोजणी सहायक, १३७ मतमोजणी पर्यवेक्षक आणि १५८ सूक्ष्म निरीक्षक, पुणे लोकसभेसाठी १६८ मतमोजणी सहायक, १५९ मतमोजणी पर्यवेक्षक आणि १६३ सूक्ष्म निरीक्षक, बारामतीसाठी १६४ मतमोजणी सहायक, १५२ मतमोजणी पर्यवेक्षक आणि १५३ सूक्ष्म निरीक्षक, शिरुरसाठी १६२ मतमोजणी सहायक, १५२ मतमोजणी पर्यवेक्षक आणि १६६ सूक्ष्म निरीक्षकांची नेमणूक करण्यात आली आहे.

पोस्टल व ईटीपीबीएस मतमोजणीसाठी मावळ लोकसभा मतदार संघात १४ मतमोजणी सहायक, ७ मतमोजणी पर्यवेक्षक आणि ८ सूक्ष्म निरीक्षक, पुणे लोकसभेसाठी १९ मतमोजणी सहायक, १२ मतमोजणी पर्यवेक्षक आणि १४ सूक्ष्म निरीक्षक, बारामतीसाठी २० मतमोजणी सहायक, १० मतमोजणी पर्यवेक्षक आणि १८ सूक्ष्म निरीक्षक तर शिरुर लोकसभा मतदार संघासाठी १६ मतमोजणी सहायक, प्रत्येकी १८ मतमोजणी पर्यवेक्षक आणि सूक्ष्म निरीक्षक यांची नेमणूक करण्यात आली आहे.