ट्रेनमध्ये रात्री मोबाइल चार्जिंग करता येणार नाही? रेल्वे बोर्डाचे कडक निर्देश; काय आहे नियम?

मुंबई : लांब पल्ल्याच्या रेल्वे प्रवासात मोबाइलची बॅटरी संपल्यास प्रवासी गाडीतील चार्जिंग पॉइंटचा वापर करतात. मात्र, रात्रीच्या प्रवासात या सुविधेवर वेळेची मर्यादा लागू आहे. रात्री ११ ते सकाळी ५ या वेळेत रेल्वेतील मोबाइल चार्जिंग पॉइंट बंद ठेवण्याच्या नियमाची कठोर अंमलबजावणी करण्याचे निर्देश रेल्वे बोर्डाने दिले आहेत. त्यामुळे रात्री प्रवास करणाऱ्या प्रवाशांनी याची नोंद घेणे आवश्यक आहे.

पॉवर बँक फुटल्याच्या घटनेनंतर रेल्वे बोर्डाचे निर्देश

दक्षिण पूर्व रेल्वेमध्ये चार्जिंग सुरू असताना एका प्रवाशाची पॉवर बँक फुटल्याची आणि त्यातून धूर निघाल्याची घटना घडली. या घटनेनंतर रेल्वे बोर्डाने सर्व विभागीय रेल्वेंना नियमांची काटेकोर अंमलबजावणी करण्याच्या सूचना दिल्या आहेत.

रात्री ११ ते सकाळी ५ या वेळेत चार्जिंग पॉइंट बंद ठेवण्याचे निर्देश असतानाही संबंधित गाडीत त्यांचे पालन झाले नसल्याचे समोर आले. या पार्श्वभूमीवर प्रवाशांच्या सुरक्षिततेला प्राधान्य देत नियमांचे पालन सुनिश्चित करण्यास रेल्वे बोर्डाने सांगितले आहे.

नियम मोडल्यास होणार तपासणी

चार्जिंग पॉइंट बंद ठेवण्याच्या नियमाची अंमलबजावणी योग्य पद्धतीने होते की नाही, यावर आता अधिक लक्ष दिले जाणार आहे. संबंधित कर्मचाऱ्यांना आवश्यक सूचना देण्याबरोबरच त्यांचे समुपदेशन आणि प्रशिक्षणही आयोजित केले जाणार आहे.

तसेच अधिकारी आणि पर्यवेक्षकांना गाड्यांमध्ये अचानक तपासणी करण्याचे निर्देश देण्यात आले आहेत. रात्रीच्या निर्धारित वेळेत चार्जिंग पॉइंट बंद आहेत की नाही, याची प्रत्यक्ष पडताळणी केली जाणार आहे.

२०१४ मध्येही जारी केले होते निर्देश

रेल्वे गाड्यांमधील मोबाइल चार्जिंग पॉइंट रात्री बंद ठेवण्याचा नियम नवीन नाही. रेल्वे बोर्डाने १९ जून २०१४ रोजीही यासंदर्भात निर्देश जारी केले होते. त्यानुसार रात्री ११ ते सकाळी ५ या वेळेत चार्जिंग पॉइंट बंद ठेवण्यास सांगण्यात आले होते.

मात्र, दक्षिण पूर्व रेल्वेमध्ये घडलेल्या घटनेनंतर या नियमाची पुन्हा कठोर अंमलबजावणी करण्यावर भर देण्यात आला आहे. सर्व विभागीय रेल्वेंनी जुन्या निर्देशांचे पालन करावे आणि देखरेख व्यवस्था अधिक प्रभावी करावी, असे बोर्डाने स्पष्ट केले आहे.

रेल्वे प्रवाशांनी काय काळजी घ्यावी?

रात्री प्रवास करणाऱ्या प्रवाशांनी मोबाइल चार्ज करण्याचे नियोजन या वेळेची मर्यादा लक्षात घेऊन करावे. प्रवास सुरू करण्यापूर्वी मोबाइलची बॅटरी चार्ज करून घेणे उपयुक्त ठरेल. तसेच चार्जिंगसाठी वापरण्यात येणाऱ्या उपकरणांची सुरक्षितता तपासणेही महत्त्वाचे आहे.

रेल्वे बोर्डाने प्रवाशांच्या सुरक्षिततेच्या दृष्टीने या नियमाच्या पालनावर भर दिला आहे. कर्मचाऱ्यांचे प्रशिक्षण आणि अचानक तपासणी यांच्या माध्यमातून रेल्वे गाड्यांमधील विद्युत उपकरणांच्या वापरावर अधिक देखरेख ठेवण्याचे नियोजन करण्यात आले आहे