पुणे महापालिकेत राष्ट्रवादीचा सत्तेत प्रवेश? उपमहापौरपदावर अजितदादांच्या पक्षाचा दावा; सुनेत्रा पवारांशी होणार निर्णायक चर्चा
पुणे : पुणे महानगरपालिकेतील सत्तासमीकरणांमध्ये मोठी राजकीय घडामोड घडण्याची शक्यता निर्माण झाली आहे. राज्यात महायुती सरकारचा घटक पक्ष असलेल्या अजित पवार यांच्या राष्ट्रवादी काँग्रेसने आता पुणे महापालिकेतील सत्तेतही सहभागी होण्याची भूमिका स्पष्ट केली आहे. पक्षाचे नेते संजय काकडे यांनी राष्ट्रवादीला उपमहापौरपद मिळावे, अशी मागणी लवकरच उपमुख्यमंत्री तथा पक्षाच्या वरिष्ठ नेत्या सुनेत्रा पवार यांच्याकडे मांडणार असल्याचे जाहीर केले आहे. त्यामुळे पुण्यातील राजकीय समीकरणांमध्ये नव्या चर्चांना उधाण आले आहे.
सध्या पुणे महापालिकेत राष्ट्रवादी काँग्रेस विरोधी बाकावर असली तरी राज्यात आणि केंद्रात महायुतीसोबत सत्ता वाटणी असल्याने स्थानिक स्वराज्य संस्थांमध्येही त्याचे प्रतिबिंब दिसायला हवे, अशी भूमिका काकडे यांनी घेतली आहे. महापालिकेच्या सत्तेत सहभागी होऊन राष्ट्रवादीला उपमहापौरपदासह सत्तेतील योग्य प्रतिनिधित्व मिळावे, अशी त्यांची अपेक्षा आहे.
संजय काकडे यांनी सांगितले की, पुणे महापालिकेत राष्ट्रवादी काँग्रेसचे सुमारे २२ ते २३ नगरसेवक आहेत. त्यामुळे पक्षाची ताकद लक्षात घेता सत्तेत योग्य वाटा मिळणे स्वाभाविक आहे. महापालिका निवडणुकीनंतरही पक्षाकडून अशी अपेक्षा व्यक्त करण्यात आली होती. मात्र त्यावेळी कोणतेही महत्त्वाचे पद राष्ट्रवादीच्या वाट्याला आले नाही. आता हा मुद्दा पुन्हा पक्ष नेतृत्वासमोर मांडला जाणार असल्याचे त्यांनी स्पष्ट केले.
यासंदर्भात आपण लवकरच सुनेत्रा पवार यांची भेट घेणार असून, पुण्याच्या सत्तेत राष्ट्रवादीचा सहभाग आणि उपमहापौरपदाची मागणी त्यांच्या निदर्शनास आणून देणार असल्याचे काकडे यांनी सांगितले. तसेच पार्थ पवार, पक्षाध्यक्ष आणि वरिष्ठ नेते जो अंतिम निर्णय घेतील, तो पक्षाला मान्य असेल, असेही त्यांनी स्पष्ट केले.
काकडे यांनी मुख्यमंत्री देवेंद्र फडणवीस यांच्याकडेही ही मागणी मांडण्याचे संकेत दिले आहेत. मुंबईसह इतर महापालिकांमध्ये महायुतीतील घटक पक्षांना विविध पदांमध्ये प्रतिनिधित्व देण्यात आले आहे. त्याच धर्तीवर पुणे महापालिकेतही राष्ट्रवादी काँग्रेसला उपमहापौरपद मिळावे, अशी मागणी केली जाणार असल्याचे त्यांनी सांगितले.
या वक्तव्यानंतर पुणे महापालिकेतील विद्यमान सत्तासमीकरणांमध्ये बदल होण्याची शक्यता व्यक्त केली जात आहे. राष्ट्रवादी काँग्रेस सत्तेत सहभागी झाल्यास महापालिकेतील राजकीय समीकरणांना नवे वळण मिळू शकते. मात्र याबाबतचा अंतिम निर्णय सुनेत्रा पवार, पक्षाचे वरिष्ठ नेतृत्व आणि महायुतीतील चर्चेनंतरच स्पष्ट होणार आहे. त्यामुळे आगामी काही दिवसांत पुण्याच्या राजकारणात या मुद्द्यावर महत्त्वाच्या घडामोडी घडण्याची शक्यता आहे.
