तिरंगा मोर्चात शरद पवारांची ‘सरप्राईज’ एन्ट्री होणार? राज ठाकरेंचा थेट फोन, मुंबईच्या राजकारणात नव्या समीकरणांची जोरदार चर्चा
मुंबई : रविवारी मुंबईत होणाऱ्या तिरंगा मोर्चापूर्वी राज्याच्या राजकारणात मोठ्या हालचालींना वेग आला आहे. मनसे अध्यक्ष राज ठाकरे यांनी राष्ट्रवादी काँग्रेस (शरद पवार गट)चे अध्यक्ष शरद पवार यांच्याशी दूरध्वनीवरून संपर्क साधल्याची माहिती समोर आल्यानंतर, उद्याच्या मोर्चात शरद पवार सहभागी होणार का, याबाबत राजकीय वर्तुळात जोरदार चर्चा सुरू झाली आहे. या संदर्भात अधिकृत घोषणा अद्याप झालेली नसली, तरी विविध पक्षांमध्ये पडद्यामागील हालचाली सुरू असल्याचे बोलले जात आहे.
दिल्लीत सुरू असलेल्या NEET पेपरफुटी आंदोलनाच्या पार्श्वभूमीवर शिवसेना (उद्धव बाळासाहेब ठाकरे) आणि महाराष्ट्र नवनिर्माण सेनेने मुंबईत संयुक्त तिरंगा मोर्चाची घोषणा केली आहे. दादर येथील छत्रपती शिवाजी महाराज पार्कपासून सिद्धिविनायक मंदिरापर्यंत हा मोर्चा काढण्यात येणार असून विद्यार्थ्यांच्या प्रश्नांवर राज्यभरातून नागरिकांनी सहभागी व्हावे, असे आवाहन आयोजकांनी केले आहे.
सूत्रांच्या माहितीनुसार, राज ठाकरे यांनी शरद पवार यांच्याशी दूरध्वनीवर संवाद साधून मोर्चात सहभागी होण्याबाबत चर्चा केली. या चर्चेदरम्यान विद्यार्थ्यांच्या प्रश्नांवर सर्व विरोधी पक्षांनी एकत्रित भूमिका घेण्याबाबतही विचारविनिमय झाल्याची माहिती समोर येत आहे. मात्र, या चर्चेची अधिकृत पुष्टी कोणत्याही पक्षाकडून करण्यात आलेली नाही.
दरम्यान, काँग्रेस प्रदेशाध्यक्ष हर्षवर्धन सपकाळ यांनी आधीच या मोर्चाला पाठिंबा जाहीर केला आहे. त्यामुळे ठाकरे बंधू, काँग्रेस आणि शरद पवार गट एकाच व्यासपीठावर दिसणार का, याकडे राजकीय निरीक्षकांचे लक्ष लागले आहे. काही दिवसांपूर्वी आयोजित राष्ट्रगीत मोर्चामध्ये शरद पवार गटाचे नेते जयंत पाटील यांचे पुत्र प्रतीक पाटील सहभागी झाले होते. त्यामुळे या वेळीही राष्ट्रवादी काँग्रेसकडून सकारात्मक भूमिका घेतली जाऊ शकते, अशी चर्चा आहे.
मोर्चाच्या तयारीसाठी राज ठाकरे यांनी मुंबईतील विविध विभागांच्या पदाधिकाऱ्यांची बैठक घेतली. या बैठकीत मोर्चा शांततेत पार पाडण्यावर विशेष भर देण्यात आला. प्रत्येक कार्यकर्त्याने हातात तिरंगा घेऊन सहभागी व्हावे, कोणतेही पक्षीय झेंडे किंवा घोषणाबाजी टाळावी आणि विद्यार्थ्यांच्या प्रश्नालाच केंद्रस्थानी ठेवावे, अशा सूचना पदाधिकाऱ्यांना देण्यात आल्याचे समजते.
मनसेकडून मोर्चादरम्यान कोणताही अनुचित प्रकार घडू नये यासाठी विशेष स्वयंसेवक पथकही तयार करण्यात आले आहे. आंदोलनात घुसखोरी करून वातावरण बिघडवण्याचा प्रयत्न करणाऱ्यांवर लक्ष ठेवण्याच्या सूचना देण्यात आल्या आहेत. अशा व्यक्तींना तत्काळ पोलिसांच्या ताब्यात देण्यात येईल, असे पक्षाच्या नेत्यांनी स्पष्ट केले आहे.
मोर्चापूर्वी शिवतीर्थावर राज ठाकरे आणि शिवसेना (उद्धव बाळासाहेब ठाकरे)चे खासदार संजय राऊत यांच्यातही महत्त्वाची बैठक झाली. जवळपास १५ मिनिटे झालेल्या या चर्चेत मोर्चाचे नियोजन, विविध पक्षांचा सहभाग आणि पुढील रणनीतीवर चर्चा झाल्याचे समजते. त्यानंतरच राज ठाकरे यांनी शरद पवार यांच्याशी संपर्क साधल्याची माहिती समोर आली.
विद्यार्थ्यांच्या प्रश्नावर एकजूट दाखवण्याचा प्रयत्न म्हणून या मोर्चाकडे पाहिले जात असले, तरी त्याचे राजकीय परिणामही महत्त्वाचे ठरणार आहेत. आगामी स्थानिक स्वराज्य संस्था निवडणुकांच्या पार्श्वभूमीवर विरोधकांची एकजूट कितपत मजबूत होते आणि शरद पवार प्रत्यक्ष मोर्चात सहभागी होतात की केवळ नैतिक पाठिंबा देतात, याकडे राज्याच्या राजकीय वर्तुळाचे लक्ष लागले आहे. अधिकृत निर्णय जाहीर होईपर्यंत चर्चांना मात्र आणखी उधाण येण्याची चिन्हे आहेत.
