पूर्णेकर प्रकरणात ‘ती’ तरुणी कोण? आदल्या रात्री दोन मुलांसोबत खोलीत, दुसऱ्याच दिवशी… पोलिसांच्या रडारवर!
ठाणे : शिवसेना ठाकरे गटाचे विभागप्रमुख प्रदीप पूर्णेकर यांच्या प्रकरणाच्या तपासात आता एक नवा आणि महत्त्वाचा धागा समोर आला आहे. पूर्णेकर यांच्या मुलगा राम पूर्णेकर यांनी पोलिसांना दिलेल्या जबाबातील माहितीनंतर एका तरुणीची चौकशी करण्यात आली आहे. घटनेच्या आदल्या दिवशी ही तरुणी दोन मुलांसोबत एका खोलीत आढळून आली होती, असा दावा राम पूर्णेकर यांनी जबाबात केल्याची माहिती आहे. या घटनेनंतर तीच तरुणी कार्यालयाबाहेरही दिसून आल्याचं सांगण्यात आलं आहे.
प्रदीप पूर्णेकर यांनी काही मुद्द्यांविरोधात आवाज उठवला होता. त्याच दिवशी आणि त्यानंतर संबंधित तरुणी कार्यालयाबाहेर दिसून आल्याचं राम पूर्णेकर यांनी पोलिसांना सांगितल्याचं समोर आलं आहे. विशेष म्हणजे, घटनेच्या एक दिवस आधी ती तरुणी परिसरात फिरत असल्याचंही त्यांच्या जबाबात नमूद असल्याचं सांगितलं जात आहे. त्यामुळे या तरुणीचा पूर्णेकर प्रकरणाशी काही संबंध आहे का, याचा तपास पोलिसांकडून केला जात आहे.
राम पूर्णेकर यांच्या जबाबानंतर पोलिसांनी संबंधित तरुणीला चौकशीसाठी बोलावलं. ती त्या ठिकाणी नेमकी का आली होती, तिच्यासोबत असलेले दोन तरुण कोण होते, तिची प्रदीप पूर्णेकर यांच्याशी काही ओळख किंवा संपर्क होता का आणि पूर्णेकर यांनी तिच्याबाबत जाब का विचारला होता, या प्रश्नांची उत्तरं तपासातून शोधली जात आहेत. मात्र, या तरुणीचा गुन्ह्यात सहभाग असल्याचं अद्याप पोलिसांनी स्पष्ट केलेलं नाही. त्यामुळे तिच्याबाबत समोर आलेली माहिती ही सध्या तपासाचा एक भाग आहे.
दरम्यान, प्रदीप पूर्णेकर प्रकरणात शिवसेना शिंदे गटाच्या नेत्या मिनाक्षी शिंदे आणि त्यांच्या पतीवर आरोप करण्यात आले आहेत. मात्र, मिनाक्षी शिंदे यांनी हे आरोप स्पष्टपणे फेटाळले आहेत. या प्रकरणाशी आपला कोणताही संबंध नसून, पुरावे नसताना आपल्यावर आरोप केले जात असल्याचं त्यांनी म्हटलं आहे. तसेच पोलिसांना तपासात पूर्ण सहकार्य करणार असल्याचंही त्यांनी स्पष्ट केलं.
मिनाक्षी शिंदे यांनी दिशा सालियान प्रकरणाचा संदर्भ देत, आधी आदित्य ठाकरे यांना अटक करा आणि त्यानंतर माझ्यावर आरोप करा, असं वक्तव्य केलं होतं. त्यामुळे या प्रकरणाला राजकीय रंगही मिळाला आहे. ठाकरे गटाकडून हा मुद्दा सातत्याने उपस्थित केला जात आहे.
या प्रकरणातील संशयित आरोपींना पोलिसांनी ताब्यात घेतल्याची माहिती आहे. कथित शूटरही पोलिसांच्या ताब्यात असल्याचं सांगण्यात आलं आहे. दुसरीकडे, पूर्णेकर कुटुंबीयांकडून या प्रकरणात गंभीर आरोप करण्यात आले आहेत. शिवसेना ठाकरे गटाचे पक्षप्रमुख उद्धव ठाकरे यांनी पूर्णेकर कुटुंबीयांची भेट घेतली असून, सुषमा अंधारे यांनीही कुटुंबीयांची भेट घेतली आहे.
आता तपासात समोर आलेली ही तरुणीची माहिती नेमकी कुठे घेऊन जाते, याकडे लक्ष लागलं आहे. घटनेच्या आदल्या दिवशी दोन तरुणांसोबत तिची उपस्थिती, त्यानंतर कार्यालयाबाहेर दिसणं आणि प्रदीप पूर्णेकर यांनी तिच्याबाबत जाब विचारल्याचा दावा या सर्व बाबींची पोलिसांकडून पडताळणी सुरू आहे. त्यामुळे या नव्या धाग्यातून प्रदीप पूर्णेकर प्रकरणातील आणखी कोणती माहिती समोर येते, हे पाहणं महत्त्वाचं ठरणार आहे.
