रात्री कुटुंबासोबत जेवण, त्यानंतर शांत झोपल्या; मध्यरात्री अचानक जाग आली अन् घडला काळजाचा थरकाप उडवणारा प्रकार! घोणसच्या दंशाने वंदना जाधव यांचा दुर्दैवी मृत्यू

सांगली : रात्री संपूर्ण कुटुंबासोबत जेवण करून नेहमीप्रमाणे झोपायला गेलेल्या महिलेवर मध्यरात्री काळाने घाला घातला. गाढ झोपेत असताना घरात शिरलेल्या विषारी घोणस सापाने दंश केल्याने ५० वर्षीय महिलेचा मृत्यू झाला. पती आणि मुलीला जागे करून सर्पदंशाची माहिती देणाऱ्या या महिलेने रुग्णालयात पोहोचण्यापूर्वीच प्राण सोडले. सांगली जिल्ह्यातील वाळवा तालुक्यातील तांबवे गावात घडलेल्या या घटनेमुळे परिसरात हळहळ व्यक्त होत आहे.

मृत महिलेचे नाव वंदना अनिल जाधव (वय ५०) असे आहे. त्या तांबवे येथील कासेगाव रस्त्यालगत असलेल्या शेतातील घरात कुटुंबासोबत राहत होत्या. त्यांचे पती अनिल जाधव हे गावातील प्रगतशील शेतकरी म्हणून परिचित आहेत. या घटनेने जाधव कुटुंबावर दुःखाचा डोंगर कोसळला आहे.

मध्यरात्री अचानक जाग आली अन् समोर उभं राहिलं संकट

मिळालेल्या माहितीनुसार, शुक्रवारी रात्री वंदना जाधव यांनी कुटुंबीयांसोबत जेवण केले. त्यानंतर सर्वजण आपापल्या खोलीत झोपण्यासाठी गेले. घरात सर्वत्र शांतता असताना मध्यरात्री साधारण एकच्या सुमारास वंदना यांना अचानक जाग आली. त्यांना तीव्र वेदना जाणवू लागल्याने त्यांनी पाहिले असता विषारी घोणस सापाने दंश केल्याचे लक्षात आले.

प्रसंगाचे गांभीर्य ओळखून त्यांनी तातडीने शेजारी झोपलेल्या पती अनिल जाधव आणि मुलगी अमरजा यांना उठवले. साप चावल्याची माहिती त्यांनी कुटुंबीयांना दिली. अचानक घडलेल्या या प्रकारामुळे घरात एकच घबराट पसरली. कुटुंबीयांनी वेळ न दवडता त्यांना उपचारासाठी रुग्णालयात नेण्याची धावपळ सुरू केली.

कराडला नेत असतानाच मृत्यूशी झुंज अपयशी

वंदना यांना तातडीने पुढील उपचारांसाठी कराड येथील रुग्णालयात हलवण्यात येत होते. मात्र, सर्पदंशानंतर त्यांची प्रकृती झपाट्याने खालावली. रुग्णालयात पोहोचण्यापूर्वीच वाटेत त्यांची प्राणज्योत मालवली. त्यामुळे उपचार मिळण्यापूर्वीच त्यांचा दुर्दैवी अंत झाला.

कुटुंबावर दुःखाचा डोंगर

वंदना जाधव यांच्या पश्चात पती, मुलगा, मुलगी आणि नातवंडे असा परिवार आहे. काही क्षणांपूर्वी एकत्र जेवण करून आनंदाने दिवस संपवणाऱ्या कुटुंबावर मध्यरात्री अचानक दुःखाचा डोंगर कोसळला. या घटनेची माहिती गावात पसरताच तांबवे परिसरात शोककळा पसरली असून नागरिकांकडून हळहळ व्यक्त केली जात आहे.