तनिषा भिसे मृत्यू प्रकरणातील तिसरा अहवाल राज्य शासनाला सादर, मृत्यूचे खरे कारणही आलं समोर, आता कारवाई काय होणार?
पुणे : पुण्यातील दीनानाथ मंगेशकर हॉस्पिटलच्या हलगर्जीपणामुळे एका गर्भवती महिलेला आपला जीव गमवावा लागल्याची घटना समोर आली होती, चौकशी अहवालातून देखील रुग्णालयावरच ठपका ठेवण्यात आला आहे, त्यानंतर आता डॉ. सुश्रुत घैसास यांनी राजीनामा दिला आहे. त्यांनी आपला राजीनामा रुग्णालयाचे संचालक डॉ. धनंजय केळकर यांच्याकडे सुपूर्द केला.
सुश्रुत भिसे यांच्यावर गंभीर आरोप करण्यात आले आहेत. या प्रकरणी मोठा वाद झाल्यानंतर आता डॉ. सुश्रुत घैसास यांनी आपल्या पदाचा राजीनामा दिला आहे. असे असताना रूग्णालयातील गर्भवती महिलेच्या मृत्यू प्रकरणासंदर्भात एक अपडेट समोर आली आहे. पुण्यातील गर्भवती महिलेच्या मृत्यू प्रकरणाचा तिसरा अहवाल समोर आला असून यातून तनिषा भिसे यांच्या मृत्यूचं कारण उघड झालं आहे.
यामध्ये म्हटले आहे की, तातडीने उपचार न मिळाल्याने गर्भवती महिला तनिषा भिसे यांचा मृत्यू झाल्याचे अहवालातून समोर आले आहे. यासह मेंदूला ऑक्सिजनचा पुरेसा पुरवठा झाला नाही. मेंदूच्या पेशींवर परिणाम होऊन मेंदूचे कार्य बिघडल्याने मृत्यू झाला, असं अहवालात सांगण्यात आलंय. दीनानाथ मंगेशकर रूग्णालयातील गर्भवती महिलेच्या मृत्यू प्रकरणासंदर्भात आतापर्यंत तीन अहवाल समोर आले आहेत.
दरम्यान, तिसरा अहवाल हा पुणे महापालिकेकडून सादर करण्यात आला असून माता मृत्यू अन्वेषण समितीचा अहवाल राज्य सरकारपुढे सादर झाला. काल भिसे कुटुंबीयांकडून नुकतीच एक प्रेस नोट जाहीर करण्यात आली होती. यामध्ये भिसे कुटुंबीयांकडून पाच मागण्या करण्यात आल्याचे पाहायला मिळाले होते.
गर्भवती तनिषा भिसे यांच्या मृत्यूप्रकरणी राज्य शासनाने चौकशी समिती नेमली असून, यासंदर्भात गंभीर आरोप समोर आले आहेत. तनिषा भिसे या २८ मार्च रोजी उपचारासाठी दीनानाथ मंगेशकर रुग्णालयात दाखल झाल्या होत्या. त्यांच्या नातेवाइकांनी रुग्णालयातील स्त्रीरोगतज्ज्ञ डॉ. सुश्रुत घैसास यांना दाखवले होते.
डॉ. घैसास यांनी ही प्रसूती जोखमीची असल्याने तनिषाला तातडीने भरती होण्याचा सल्ला दिला. मात्र, भरतीसाठी १० लाख रुपये अनामत रक्कम भरावी लागेल, अशी अट घालण्यात आल्याचा आरोप नातेवाइकांनी केला आहे. यामुळे राज्यातून या प्रकरणावर संताप व्यक्त केला जात आहे.
