दौंड शहरात खळबळ! प्रसूती दवाखाने करतात भयंकर प्रकार? कचराकुंडीत सापडले मृत १० अर्भक…
दौंड : दौंड शहरालगत असलेल्या बोरावके नगर परिसरात एका कचऱ्याच्या ढिगाऱ्यात मृत अर्भक आणि मानवी अवशेष आढळल्याची धक्कादायक घटना उघडकीस आली आहे. प्राईम टाऊनच्या पाठीमागील कचरा डंपिंगजवळ ही घटना घडली आहे.
तसेच १० ते ११ अर्भक मृत अवस्थेत आढळून आल्याने परिसरात प्रचंड खळबळ उडाली आहे. या घटनेमुळे बेकायदा गर्भपात केंद्र कार्यरत असल्याचा संशय पोलिसांकडून व्यक्त केला जात आहे.
सदर घटनेची माहिती स्थानिक नागरिकांनी पोलिसांच्या ११२ क्रमांकावर दिल्यानंतर दौंड पोलीस तत्काळ घटनास्थळी दाखल झाले. पोलिसांनी प्राथमिक पाहणी करून पंचनामा केला व तत्काळ डॉक्टरांचे वैद्यकीय पथक बोलावून घेतले. संशयास्पद बरणीतील अर्भक आणि अवशेष ताब्यात घेण्यात आले असून त्यांच्यावर पुढील वैद्यकीय तपास सुरू आहे.
पोलिसांकडून मिळालेल्या माहितीनुसार, बरणीतील अर्भक सीलबंद अवस्थेत आहे असं सांगण्यात आलं आहे. तसेच हे अवशेष प्रयोगशाळेतील वैद्यकीय नमुने असावेत की गर्भपातानंतर टाकण्यात आलेले, हे अद्याप स्पष्ट झालेले नाही. त्यामुळे पोलिसांनी सर्व शक्यतेचा विचार करत तपास सुरू केला आहे.
यासंदर्भात वैद्यकीय अहवालानंतरच अधिकृत माहिती समोर येईल, असं पोलिसांनी स्पष्ट केलं आहे. दरम्यान, एवढ्या काळानंतर अशा संवेदनशील वस्तू खुलेआम कचऱ्यात सापडणं, ही गोष्ट गंभीर असून स्थानिक प्रशासन आणि वैद्यकीय संस्थांमधील जबाबदारीवर प्रश्नचिन्ह निर्माण करणारी आहे.
दरम्यान, हे सर्व अर्भक प्लास्टिकच्या डब्यात बंद केलेले आढळून आले, ज्यामुळे बेकायदा गर्भपात केले जात असल्याचा गंभीर संशय व्यक्त केला जात आहे. या घटनेमुळे शहरात मोठ्या प्रमाणावर चर्चा रंगली असून, पोलिसांनी या प्रकरणाचा सखोल तपास सुरू केला आहे.
