अखेर भीती खरी ठरली! पेट्रोल-डिझेल महागलं; सर्वसामान्यांच्या खिशाला मोठी झळ

मुंबई : पेट्रोल आणि डिझेलच्या किमतींबाबत सर्वसामान्यांसाठी पुन्हा एकदा महत्त्वाची बातमी समोर आली आहे. राज्य सरकारच्या निर्णयामुळे एका राज्यात पेट्रोल आणि डिझेल महाग झाले असून, याचा थेट परिणाम वाहनचालकांच्या खिशावर होणार आहे.

हिमाचल प्रदेश सरकारने पेट्रोल आणि डिझेलवरील करामध्ये बदल केला आहे. सरकारने दोन्ही इंधनांवर प्रति लिटर 60 पैशांचा ‘ऑर्फन अँड विडो सेस’ लागू केला आहे. त्यामुळे राज्यात पेट्रोल आणि डिझेलच्या दरात वाढ झाली आहे.

शिमल्यात पेट्रोल-डिझेलचे नवे दर

दरवाढीनंतर हिमाचल प्रदेशची राजधानी शिमला येथे पेट्रोलचा दर 103.25 रुपये प्रति लिटर, तर डिझेलचा दर 95.21 रुपये प्रति लिटर झाला आहे. राज्य सरकारच्या कररचनेनुसार पेट्रोल आणि डिझेलच्या किमती वेगवेगळ्या असल्याने देशातील विविध राज्यांमध्ये इंधनाचे दरही वेगवेगळे असतात.

इंधन महागल्याने वाहनचालकांसह वाहतूकदारांवरही अतिरिक्त आर्थिक भार पडण्याची शक्यता आहे. पेट्रोल-डिझेलच्या दरवाढीचा परिणाम वाहतूक खर्च आणि पर्यायाने इतर वस्तूंच्या किमतींवरही होऊ शकतो.

जागतिक बाजारातही कच्च्या तेलाचे दर वाढले

दरम्यान, जागतिक बाजारातही कच्च्या तेलाच्या किमतींमध्ये चढ-उतार सुरू आहेत. पश्चिम आशियातील वाढता तणाव आणि भू-राजकीय परिस्थितीचा परिणाम आंतरराष्ट्रीय तेल बाजारावर होत आहे.

ब्रेंट क्रूडच्या किमतीत 0.92 टक्क्यांची वाढ होऊन ते प्रति बॅरल 89.73 डॉलरवर पोहोचले, तर WTI क्रूडमध्ये 1.08 टक्क्यांची वाढ नोंदवण्यात आली. त्यामुळे जागतिक बाजारातील घडामोडींवर भारतातील इंधन दरांबाबतही लक्ष ठेवले जात आहे.

हिमाचल प्रदेशातील या निर्णयामुळे राज्यातील वाहनचालकांना पेट्रोल आणि डिझेलसाठी आता अधिक पैसे मोजावे लागणार आहेत.