धक्कादायक! पुण्यात भूतानच्या तरुणीवर ७ जणांनी केला बलात्कार, राष्ट्रवादी काँग्रेसच्या माजी पदाधिकाऱ्याला बेड्या..
पुणे : भूतान देशाची नागरिक असलेल्या २७ वर्षीय तरुणीवर पुण्यात सात जणांकडून लैंगिक अत्याचार झाल्याची खळबळजनक घटना घडली आहे. . या प्रकरणी पीडित महिलेने समर्थ पोलीस ठाण्यात तक्रार दाखल केल्यानंतर पोलिसांनी सात जणांना अटक केली आहे.
पीडित महिला २०२० पासून पुण्यात राहत असून तिच्यावर लैंगिक अत्याचार करण्यात आले. अटक करण्यात आलेल्यांमध्ये राष्ट्रवादी काँग्रेसच्या माजी पदाधिकाऱ्याचा समावेश असून त्याचे नाव शंतनु कुकडे असे आहे.
त्याच्यासोबत ऋषिकेश नवले, जालिंदर बडदे, उमेश शहाणे, प्रतीक शिंदे, ॲड. विपीन बिडकर, सागर रासगे, अविनाश सूर्यवंशी आणि मुद्दासीन मेनन यांच्यावरही गुन्हा दाखल करण्यात आला आहे. पोलिसांनी यापैकी सात जणांना अटक केली असून काहींचा शोध सुरू आहे.
दरम्यान, शंतनु कुकडे याच्यावर याआधी देखील दोन वेगवेगळ्या महिलांवर लैंगिक अत्याचार केल्याचे प्रकरण नोंदवले गेले आहे. या गुन्ह्याच्या तपासादरम्यान या नव्या घटनेची माहिती समोर आली. पीडितेच्या तक्रारीवरून पोलिसांनी लगेचच कारवाई करत आरोपींना अटक केली असून याप्रकरणी पुढील तपास सुरू आहे.
मिळालेल्या माहिती नुसार, भूतानमधून आलेली ही महिला बोधगया येथे २०२० साली भारतात आली होती. पुढील शिक्षण आणि नोकरीसाठी ती पुण्यात स्थायिक झाली. यावेळी तिची ओळख ऋषिकेश नवले याच्याशी झाली आणि त्यानेच तिची ओळख शंतनु कुकडे याच्याशी करून दिली.
कुकडे याने तिला पुण्यात राहण्यासाठी घर दिले आणि शिक्षणासाठी आर्थिक मदतही केली. परंतु ह्याच ओळखीचा गैरफायदा घेत त्याने तिच्यावर लैंगिक अत्याचार केले.नंतर कुकडेने पीडितेची ओळख आपल्या इतर मित्रांसोबत करून दिली.
पार्टीच्या निमित्ताने हे सर्व आरोपी वारंवार तिच्या घरी येत असत. यातील एकजण डीजे असून दुसरा पेशाने वकील आहे. लोणावळा, रायगड आणि पानशेत या ठिकाणी पार्टीच्या नावाखाली आरोपींनी तिच्यावर पाळत ठेवत वेळोवेळी अत्याचार केले. मैत्रीचे नाटक करीत तिचा विश्वासघात करण्यात आला.
