हल्ल्यांना चाप बसणार? विश्वास नांगरे पाटलांचा धाडसी निर्णय; नागपूरच्या वाहतूक पोलिसांच्या सुरक्षेसाठी ‘सर्व्हिस गन’ अनिवार्य

नागपूर : नागपूर शहरातील वाहतूक पोलिसांवर वाढत्या हल्ल्यांच्या पार्श्वभूमीवर पोलिस आयुक्त विश्वास नांगरे पाटील यांनी महत्त्वाचा निर्णय घेतला आहे. ड्युटीदरम्यान पात्र वाहतूक पोलिस अधिकारी आणि कर्मचाऱ्यांनी सर्व्हिस गन बाळगणे बंधनकारक करण्यात आले असून, पोलिसांच्या सुरक्षेसह कायदा-सुव्यवस्था अधिक प्रभावी करण्याच्या उद्देशाने हा निर्णय घेण्यात आल्याचे सांगितले जात आहे.

नागपूरमध्ये दररोज विविध ठिकाणी वाहतूक नियंत्रण, नाकाबंदी, ड्रंक अँड ड्राईव्ह मोहीम, संशयित वाहनांची तपासणी आणि विशेष कारवाया राबवल्या जातात. या कारवायांदरम्यान वाहतूक पोलिसांना अनेकदा गुन्हेगार, मद्यधुंद चालक आणि वाहतूक नियमांचे उल्लंघन करणाऱ्यांकडून विरोधाचा सामना करावा लागतो. काही घटनांमध्ये पोलिसांवर धक्काबुक्की, मारहाण, शस्त्राने हल्ला तसेच सरकारी कामात अडथळा आणण्याचे प्रकारही घडले आहेत. या घटनांची गंभीर दखल घेत पोलिस आयुक्तांनी सुरक्षा व्यवस्थेत बदल करण्याचा निर्णय घेतला.

नवीन आदेशानुसार, सर्व्हिस गनचा वापर कोणत्याही नियमित कारवाईसाठी केला जाणार नाही. ती केवळ आत्मसंरक्षण, जीविताला धोका निर्माण झाल्यास किंवा कायद्याने परवानगी असलेल्या अत्यंत गंभीर परिस्थितीतच वापरता येणार आहे. शस्त्र हाताळणी, सुरक्षितता आणि कायदेशीर प्रक्रियेचे पालन करण्याबाबत संबंधित अधिकारी व कर्मचाऱ्यांना स्पष्ट सूचना देण्यात आल्या आहेत.

विश्वास नांगरे पाटील यांनी पदभार स्वीकारल्यानंतर नागपूर पोलिस दलात शिस्त, पारदर्शकता आणि कार्यक्षमतेवर विशेष भर दिला आहे. काही दिवसांपूर्वी त्यांनी वाहतूक पोलिसांना स्वच्छ गणवेश, नीटनेटके व्यक्तिमत्त्व आणि नागरिकांशी सौजन्यपूर्ण वर्तन राखण्याचे निर्देश दिले होते. त्यानंतर आता सुरक्षेच्या दृष्टीने सर्व्हिस गन बाळगण्याचा निर्णय घेतल्याने वाहतूक शाखेच्या कामकाजात आणखी एक मोठा बदल झाला आहे.

यापूर्वी वरिष्ठ पोलिस अधिकारी, डीसीपी, एसीपी आणि वरिष्ठ पोलिस निरीक्षकांनाही ड्युटीदरम्यान सर्व्हिस रिव्हॉल्व्हर जवळ ठेवण्याचे निर्देश देण्यात आले होते. त्याच धोरणाचा विस्तार आता वाहतूक शाखेपर्यंत करण्यात आला आहे. पोलिस दलावरील वाढते हल्ले, वाढती गुन्हेगारी आणि आपत्कालीन परिस्थितीत तात्काळ प्रतिसाद देण्याची गरज लक्षात घेऊन टप्प्याटप्प्याने सुरक्षा उपाययोजना अधिक मजबूत केल्या जात आहेत.

नागपूर वाहतूक शाखेची मंजूर पदसंख्या 843 असली तरी प्रत्यक्षात सुमारे 520 कर्मचारी शहरातील वाहतूक व्यवस्था सांभाळतात. शहरातील 20 लाखांहून अधिक वाहनांचा ताण, 171 सिग्नलयुक्त चौक आणि सातत्याने वाढणारी वाहतूक यामुळे या कर्मचाऱ्यांवर मोठा कामाचा ताण असतो. अशा परिस्थितीत त्यांच्या सुरक्षेसाठी सर्व्हिस गनचा निर्णय महत्त्वाचा मानला जात आहे.

पोलिस प्रशासनाच्या मते, या निर्णयामुळे वाहतूक पोलिसांचा आत्मविश्वास वाढेल, धोकादायक परिस्थितीत ते अधिक सक्षमपणे काम करू शकतील आणि कायदा मोडणाऱ्यांवरही प्रतिबंधात्मक दबाव निर्माण होईल. शहरातील कायदा-सुव्यवस्था अधिक मजबूत करण्याच्या दिशेने हा निर्णय महत्त्वाचा टप्पा ठरेल, अशी अपेक्षा व्यक्त केली जात आहे.