Sanjay Raut : महायुतीकडून अपक्षांना ५० कोटींची ऑफर, संजय राऊतांचा खळबळजनक दावा, मेसेजही गेले…

Sanjay Raut : महाराष्ट्रातील विधानसभा निवडणुकीसाठी मतदान झाले. मतदान पार पडल्यानंतर काही वेळातच अनेक एक्झिट पोल्स समोर आले. या पोलनुसार राज्यात पुन्हा एकदा महायुतीचे सरकार स्थापन होण्याची शक्यता वर्तवली जात आहे.

आता २३ नोव्हेंबर रोजी निकाल आहे. यानंतर आता शिवसेना ठाकरे गटाचे खासदार संजय राऊत यांनी खळबळजनक दावा केला आहे. संजय राऊत म्हणाले की, उत्तर प्रदेशमध्ये समाजवादी पार्टीला पाच जागाही मिळणार नाही, असे म्हटले होते. पण ते ४० जागा जिंकले. मोदींना ४०० जागा मिळणार, असे अंदाज होते. त्यांना बहुमत सुद्धा मिळाले नाही. लोकसभेत महाविकास आघाडीला दहा देखील जागा मिळणार नाही, असाही अंदाज होता.

मात्र आम्हाला ३१ जागा मिळाल्या. त्या सर्वेची ऐसी की तैसी, विधानसभेला महाविकास आघाडी किमान १६० जागा जिंकणार, असा विश्वास त्यांनी व्यक्त केला. हे सर्व्हे कुणी आणि कसे केले? कुठल्यातरी कंपन्या येतात, एक्झिट पोल करतात, आमचा यावर विश्वास नाही. आम्ही २६ तारखेला सरकार बनवत आहोत, असेही संजय राऊत यांनी म्हटले. Sanjay Raut

ते पुढे म्हणाले की, आतापासूनच एकनाथ शिंदे, देवेंद्र फडणवीस जे उशाशी नोटांचे बंडल घेऊन झोपतात, ते गादीमध्येही पैसे टाकून झोपतात. त्यांनी आत्तापासूनच अपक्षांना ५० कोटी, १०० कोटीची ऑफर द्यायला सुरुवात केली आहे.

म्हणजेच आम्ही जिंकत आहोत, हे तुम्ही सर्व्हेवाल्यांना सांगा. त्यांना जिंकण्याची एवढी खात्री असेल तर त्यांनी लहान पक्ष आणि अपक्ष उमेदवारांना पैशांच्या थैल्या पाठवल्या नसत्या, असा दावा संजय राऊत यांनी केला आहे.